Şəkidə fəlakət yaşanır

Fövqəladə Hallar Nazirliyi Şəkidə baş vermiş təbii fəlakətlə bağlı məlumat yayıb.

Ölkə.Az xəbər verir ki, iyulun 2-də Fövqəladə Hallar Nazirliyinin Böhran Vəziyyətlərində İdarəetmə Mərkəzinə Şəki rayonunun dağlıq ərazilərində yağan yağışlar nəticəsində Kiş çayının səviyyəsinin qalxması, çayın üzərindəki körpünün qəzalı vəziyyətə düşməsi və Kiş kəndində istirahət mərkəzlərində olan insanların köməksiz vəziyyətdə qalması barədə məlumat daxil olub.

Dərhal Fövqəladə Hallar Nazirliyinin Şimal-qərb Regional Mərkəzinin və Mülkü müdafiə qoşunlarının canlı qüvvə və texnikası insanların təxliyyəsi üçün hadisə yerinə cəlb olunub. Bu gün 35 nəfər Nazirliyin qüvvələri tərəfindən təxliyyə olunub. Hazırda Kiş kəndi ilə gediş-gəlişin bərpa olunması üçün texnikalar hadisə yerində işləyir.

***

"Azəravtoyol" ASC-dən Milli.Az-a bildiriblər ki, ötən gecə təxminən saat 00 radələrində Şəki rayonu ərazisində yerləşən yerli əhəmiyyətli Şəki-Kiş avtomobil yolunun 1-ci kilometrliyində, Kiş çayı üzərində yerləşən ikiaşırımlı avtomobil körpüsünün orta dayağını dağlardan gələn lil-sel kütləsi yuyub aparıb, nəticədə körpünün hər iki aşırımı uçduğundan Kiş kəndinin rayon mərkəzi ilə avtonəqliyyat əlaqəsi tamamilə kəsilib. Kiş çayında dağlardan gələn  lil-palçıq tullantılarının qalınlığı təxminən 1-1,5 metrdir.

Təbii fəlakətin baş verdiyi əraziyə "Azəravtoyol" ASC-nin və digər aidiyyəti qurumların mütəxəssisləri cəlb olunublar. Qısa müddət ərzində alternativ yolun salınması ilə körpünün bərpası istiqamətində addımlar atılacaq. Hazırda isə avtonəqliyyat vasitələrinin rayon mərkəzi ilə əlaqəsi Oxud yolundan istifadə etməklə təmin olunur ki, bu yolun da uzunluğu təxminən 10 kilometrdir.

Qeyd edək ki, iki aşırımlı (2 x 31m) avtomobil körpüsünün ümumi uzunluğu 74 metr, qabariti isə 8,4 metrdir.

***

Şəkinin dağlıq ərazilərinə yağan yağışlar Kiş çayının daşmasına səbəb olub. Anspress-in məlumatına görə, çayın daşması nəticəsində Kiş kəndini şəhərlə birləşdirən körpü tamamilə dağıldığından kəndin Şəki şəhəri ilə əlaqəsi kəsilib. Çay özü ilə sel suları ilə bərabər lil təbəqəsi də gətirdiyindən ərazidə gediş-gəliş demək olar ki, məhdudlaşıb. 
  
Hadisə baş verdikdən sonra rayon icra hakimiyyətinin başçısı, hüquq mühafizə orqanlarının rəhbərləri və digər aidiyyatı qurumlar da əraziyə gəliblər.

Körpünün uçması nəticəsində  şəhərlə əlaqə  kəsildiyindən Kiş kəndinin  yuxarı hissəsində 50 nəfər adam qalıb. Onların 20-si çayın yaxınlığında olan istirahət mərkəzlərinin birində qalan turistlər olub. İstirahət mərkəzində qalan insanları təxliyyə etmək üçün əraziyə Fövqəladə Hallar Nazirliyinin canlı qüvvəsi və xüsusi texnikası cəlb olunub.  İnsanlar ərazidən helikopterlə təxliyə ediliblər.

300 metrə yaxın əsas daşıyıcı qaz xəttinin boruları sıradan çıxıb, kəndə elektrik enerjisinin verilməsi kəsilib, telefon xətləri sıradan çıxıb.

Aidiyyatı qurumlarının iştirakı ilə ərazilərə baxış keçirdiyini deyən icra başçısı Elxan Usubov  bildirib ki, ilk olaraq kəndlə əlaqənin bərpa olunması üçün rayonun Qoxmuq kəndi ərazisindən alternativ yol salınacaq. 

Açıq havada qərargah yaradıldığını deyən icra başçısı Kiş kəndinə qaz və elektrik verilişinin təhlükəsizlik səbəbindən dayandırıldığını deyib.

Sel suları ərazidə yerləşən bir neçə istirahət mərkəzinə  ciddi   ziyan  vurub. Ərazi  hidrometrologiya idarəsindən bildiriblər ki, yağış nəticəsində Kiş çayının Damarçın qolu ərazisindən gələn  sel suları daşqına səbəb olub. Yüksəklikdə  yerləşən  dərələrdən  axan çayların meyllilik dərəcəsi yüksək olduğundan boyük sürət axını yaranıb. Bu zaman dərələrdə erroziya nəticəsində əmələ gələn yığıntılar isə lil təbəqəsi şəklində sel sularına qarışıb. 

Hidrometrologiya idarəsindən onu da bildirdilər ki,  iyulun 1-dən 4-dək yağıntılı hava barədə əvvəlcədən aidiyyatı qurumlara məlumat verilib.