Rusiyada iki azərbaycanlı həmvətənlərini hədələyərək pul tələb ediblər
Rusiyanın Bryansk vilayətində həmvətənlərinə hədə-qorxu gələrək ondan pul tələb edən iki Azərbaycan vətəndaşı saxlanılıb.
Vilayət prokurorluğu 1980-ci il təvəllüdlü Qəzənfər İsmayılov və 1968-ci il təvəllüdlü Ramazan Feyzullayevə qarşı cinayət işini məhkəməyə göndərib.
İstintaqın versiyasına görə, R.Feyzullayev və Q.İsmayılov 2015-ci ilin avqustundan dekabr ayına qədər tanışları olan həmvətənlərinə Rusiya ərazisindən ekstardisiya ediləcəyi bəhanəsiylə hədə-qorxu gələrək sonuncudan 160 min rubl (3800 man) pul tələb edib.
Cinayət işinin istintaqı zamanı təqsirləndirilən şəxslər ittihamları tam qəbul ediblər.
Belə cinayət törətdiklərinə görə, onlar 7 il müddətinə azadlıqdan məhrumetmə cəzası ilə üzləşə bilərlər. (oxu.az)
