AXCP Ali Məclisinin üzvü övladı ilə birlikdə həlak oldu
Cəlilabadda ölümlə nəticələnən ağır yol-nəqliyyat hadisəsi baş verib.
Ölkə.Az xəbər verir ki, rayon Polis Şöbəsinin (RPŞ) növbətçi hissəsindən APA-nın cənub bürosuna verilən məlumata görə, hadisə ötən gün axşam saatlarında Cəlilabad-Cəngən avtomobil yolunda qeydə alınıb.
Cəlilabad şəhər sakini, 1979-cu il təvəllüdlü Firdovsi Kəmaləddin oğlu Məlikovun idarə etdiyi “VAZ-2107” markalı minik avtomobili qəfildən idarəetməni itirərək yolun kənarındakı dərəyə aşıb. Çoxsaylı bədən xəsarətləri alan sürücü və onun 6 aylıq oğlu hadisə yerində ölüblər.
Faktla bağlı Cəlilabad RPŞ-də araşdırma aparılır.
Qeyd edək ki, həlak olan şəxs AXCP Ali Məclisinin üzvü Firdovsi Məlikovdur.
Bu barədə Müsavat başqanının müşaviri Yadigar Sadıqov da öz Feysbuk hesabında yazıb: “AXCP üzvü Firdovsi Məlikov övladı ilə birlikdə avtomobil qəzasında həlak olub. Çox acınacaqlı xəbərdir. Allah rəhmət eləsin. Yaxınlarına başsağlığı verirəm”.