Bakıda mühafizəçini döydürən "003" nömrə nişanlı "Range Rover"li xanımın əri həbs olundu

Bakıda mühafizəçini ölümcül döydürən "003" nömrə nişanlı "Range Rover" avtomobilinin xanım sürücüsü ilə bağlı yeni faktlar ortaya çıxıb.

Bir neçə gün əvvəl Səbail rayonu ərazisində, Abşeron mehmanxanasının yaxınlığında yerləşən yaşayış kompleksinin mühafizəçisi bir qızın şikayəti ilə ölümcül hala salınması barədə xəbər verilmişdi.

Ölkə.Az xəbər verir ki, Criminal.az saytının yaydığı məlumata görə, cavan xanım sürücü idarə etdiyi "-- -- 003" dövlət qeydiyyat nişanlı son model "Range Rover" markalı avtomobili park etmək istəyib. Yer olmadığından avtomobilini yaşayış kompleksinin həyətində saxlamaq istəyib. Lakin binanın mühafizəçisi ona icəzə verməyib. Həmin xanım kiməsə zəng edərək mühafizəçidən şikayətlənib. Az sonra "AA" dövlət nömrə seriyalı qara rəngdə "Mercedes" markalı avtomobillə iki nəfər həmin yerə gəlib. Onlar mühafizəçi huşunu itirənədək onu döyüb, sonra isə maşına əyləşərək ərazini tərk ediblər. Yerdə qan içərisində olan mühafizəçini təcili yardım maşını xəstəxanaya aparıb.

Məlumat saytda yayımlanandan sonra məsələ Daxili İşlər Nazirliyinin rəhbərliyi tərəfindən nəzarətə götürülüb. Məlum olub ki, mühafizəçini döyən şəxs elə sifarişi verən qadının əridir.

Qadının əri hadisədən sonra həbs olunub.

Məsələ ilə bağlı Səbail rayon Polis İdarəsindən açıqlama almaq mümkün olmadı. Həbs olunan şəxsin adı açıqlanmasa da, o, yüksək vəzifəli şəxslərlə yaxın əlaqələrə malikdir. Mövzüni davam etdirəcəyik.