Rusiyada saxta pul satan azərbaycanlıya hökm oxundu

Kirov şəhərində Azərbaycandan olan Aqşin Rəfiyev barəsində ittiham hökmü çıxarılıb.

Ölkə.Az Virtualaz.org-a istinadən bildirir ki, Kirov Vilayət Prokurorluğundan verilən məlumata görə, onu Rusiya Federasiyası Cinayət Məcəlləsinin 186-cı maddəsinin 1-ci bəndi (Rusiya Mərkəzi Bankının saxta bank biletinin satışı və satış üçün daşınması) üzrə mühakimə ediblər.

Məhkəmə tərəfindən müəyyən edilib ki, A.Rəfiyev öz avtomobilində Yuryanski rayonunun ərazisinə keçərək, "Kababxana" kafesinə gəlib və satıcıdan ona xidmət göstərməsini xahiş edib. Hesablaşarkən isə satıcıya 5 min rublluq saxta bank bileti verib. Məhkəmə prosesinin gedişatında Rəfiyev öz günahını tamamilə etiraf edib və peşman olduğunu bildirib.

Məhkəmənin gedişatında, həmçinin məlum olub ki, A.Rəfiyev Komi Respublikasının məhkəməsi tərəfindən analoji cinayətə görə əvvəllər də ittiham edilibmiş. Məhkəmə bu faktları nəzərə alaraq, A.Rəfievi cəzasını ümumi rejimli koloniyada çəkmək şərtilə 4 il 1 ay müddətinə azadlıqdan məhrum edib. Bundan başqa, saxta puldan istifadə edən azərbaycanlı 301 min rubl məbləğində cərimə də ödəməli olacaq.