“Azəri Star”ın rəhbərinə qarşı cinayət işi

Əvvəllər Dadaşov çox zəngin adam olub.

“Azəri Star”ın keçmiş rəhbəri və “Kabusun kölgəsində” serialının aktyoru 1965-ci il təvəllüdlü Əlibəy Əlisafa oğlu Dadaşov böyük məbləğdə pulun mənimsənilməsində ittiham edilir.

Ölkə.Az xəbər verir ki, bu barədə Vesti.Az-a Səbail rayon Polis İdarəsində bildiriblər.

Cinayət işinə müvafiq olaraq bildirilir ki, Dadaşov müxtəlif banklara və fiziki şəxslərə böyük məbləğdə pul borcludur. Banklar arasında hal-hazırda fəaliyyət göstərməyən RoyalBank da var.

Bəzi məlumatlara əsasən Dadaşov çox zəngin imiş və şou-biznesə yenicə qədəm qoyan ulduzların “promouşeni” ilə məşğul olurmuş. Sonra isə müflis olub. Müflis olmasının səbəbləri bəlli deyil.

A&P Production layihəsində Ə.Dadaşovun əməkdaşı olan Pərvin Lətifovla əlaqə saxladıqda isə o, cinayət işi barədə ilk dəfə eşitdiyini bildirib. Onun sözlərinə görə o, Dadaşovu sonuncu dəfə Bakıda bir ay öncə görüb.

Qeyd edək ki, “Kabusun kölgəsində” serialında Dadaşov əsas rollardan birini – Ruslan obrazını canlandırırdı.

Ə.Dadaşovla onun mövqeyini öyrənmək üçün əlaqə qurmaq mümkün olmayıb.

Ölkə.Az