Salyanda ağır yol qəzası

Salyan rayonunda ağır yol qəzası baş verib. Hadisə nəticəsində 1 nəfər ölüb, 3 nəfər isə müxtəlif dərəcəli bədən xəsarətləri alıb.

Ölkə.Az bildirir ki, qəza hadisəsi ötən gün axşam saatlarında Ələt-Astara magistral yolunun 50-ci kilometrliyində Salyan rayonunun ərazisindən keçən hissəsində qeydə alınıb. Belə ki, Cəlilabad rayon sakini, 46 yaşlı İman Ağayev idarə etdiyi "Vaz-2115" markalı minik avtomobili ilə Astara istiqamətində hərəkətdə olarkən əks istiqamətdən gələn "Toyota" markalı maşınla qarşı-qarşıya toqquşub. Zərbə güclü olduğundan avtomobillər bir-birindən təxminən 50 metr aralıya düşüb. Qəza nəticəsində hər iki avtomobil ciddi zədələnərək dəmir yığınına çevrilib. Hadisə zamanı "Toyota"nın sürücüsü, 55 yaşlı Abşeron rayon sakini, Ağasahib Cananov xəsarətsiz ötüşsə də "Jiquli"nin sürücüsü İman Ağayev isə yerindəcə keçinib. Avtomobildə olan onun həmyerlisi, 36 yaşlı Natiq Əliyev, Biləsuvar sakinləri, 45 yaşlı Bayram Hacızadə və 41 yaşlı arvadı Dilarə Saqıyeva isə müxtəlif dərəcəli bədən xəsarətləri alıb. Yaralılar təcili yardım maşını ilə dərhal Salyan rayon mərkəzi xəstəxanasına çatdırılıb. Natiq Əliyev xəstəxanada ilk tibbi yardım aldıqdan sonra evə buraxılıb, digər yaralılar isə reanimasiya şöbəsində yerləşdirilib.Qəzanın baş verməsində hansı sürücünün günahkar olduğu hələ ki, məlum deyil. Faktla bağlı araşdırma aparılır.

İlkin Adiyev
Ölkə.Az