Kürdəmirdə 3 yaşlı oğlan körpə bacısını güllələdi

Kürdəmir rayonunda azyaşlı uşaq odlu silahdan açılan atəş nəticəsində dünyasını dəyişib.

Ölkə.Az APA TV-yə istinadən xəbər verir ki, hadisə Carlı kəndində qeydə alınıb. Kənd sakini Elnur Məmmədovun 3 yaşlı oğlu Elgiz Məmmədov atasına məxsus ov tüfəngindən atəş açaraq iki yaşlı bacısı Heyran Məmmədovanı güllələyib. Başından aldığı güllə yarası səbəbindən Heyran Məmmədova hadisə yerində dünyasını dəyişib. Uşaqların atası Elnur Məmmədov rayon Polis Şöbəsinə məlumat verib ki, həyətlərinə tez-tez çaqqal və canavarlar hücum çəkərək mal-qaraya, toyuq-cücəyə ziyan vurur.

Növbəti dəfə çaqqalın həyətə girdiyini görən Elnur Məmmədov tüfəngini götürərək ona atmaq istəyib, lakin vura bilməyib. O, silahını hazır vəziyyətə gətirərək onu stolun üstünə qoyub, paltosunu geyinmək üçün evə girib və qəflətən bayırda atəş açıldığını eşidib. O, ehtiyatsızlıq səbəbindən ailəsində baş verən bədbəxt hadisəni hüquq-mühafizə orqanlarından gizlətməyə çalışıb. Hazırda faktla bağlı Kürdəmir rayon Polis Şöbəsi tərəfindən araşdırma aparılır.

Qeyd edək ki, hazırda ailənin 2 azyaşlı övladı var.

Ölkə.Az