Şaxtalı hava bu tarixə qədər davam edəcək - VİDEO
Yeni həftəyə paytaxtda buludlu, ancaq yağmursuz hava ilə start verəcəyik. Bakıda və Abşeron yarımadasında günorta saatlarına 5-8 dərəcə isti proqnozlaşdırılır.
Milli Hidrometeorologiya Xidməti paytaxtda fevralın 19 və 20-nə dəyişkən buludlu hava vəd edir. Mülayim cənub-şərq küləyi də əsəcək.
Bölgələrimizə gəlincə, bu gecə bəzi yerlərdə hava yağıntılı olacaq. Hətta, dağlıq və dağətəyi rayonlara qar yağacağı da gözlənilir. Sabah səhərdən isə rayonlarda da hava mülayimləşəcək.
Şaxtalı hava şəraiti ilə əlaqədar olaraq fevralın 21-dək gecə və səhər saatlarında bəzi dağlıq rayonlarında yolların buz bağlama ehtimalı var.
Qeyd edək ki, hazırda qar örtüyünün hündürlüyü Şahdağ, Qrızda 10 sm, Qusarda 9 sm, Xınalıqda 6 sm, Qubada 3 sm, Xaltan, İsmayıllı, Şabran, Göygöl, Altıağacda 2 sm-dir.
Bu arada Daxili İşlər Nazirliyinin mətbuat xidmətindən bildirilib ki, belə yol şəraiti mövsümə uyğun təchiz edilməmiş, xüsusilə şinləri tələblərə cavab verməyən avtomobillərin sürücüləri üçün daha təhlükədir. Unutmaq olmaz ki, avtomobil sürüşməyə başladıqda adətən sürücülərdə çaşqınlıq hissi yaranır. Bu isə idarəetmənin, ətraf mühitə reaksiyanın itirilməsinə və nəticədə toqquşma, aşma və ya maneəyə vurma kimi qəzaların baş verməsinə zəmin yaradır. "Dəyərli sürücülər! İnanırıq ki, yol və hava şəraiti, sürət həddi, avtomobillərin qışa hazırlıq səviyyəsi, eləcə də sizin təhlükəsizliyiniz üçün verilmiş digər tövsiyələrə əməl etməklə qış fəslinin gətirdiyi çətinliklərin öhdəsindən gələcək, doğmalarınıza nigaranlıq hissi yaşatmayacaqsınız", - deyə nazirlikdən bildirilib.
Xezerxeber-in videomaterialını təqdim edirik:
