Tahir Gözəl: Dünən "Qarabağ" "İnter"i 1:0 uddu

Ağdamın "Qarabağ" komandası və İtaliyanın "İnter" komandası arasında dünən Bakının Tofiq Bəhramov stadionunda keçirilən qalmaqallı oyunun nəticələrinə həsr olunmuş mətbuat konfransı keçirilib. Konfransda AFFA Hakimlər Komitəsinin sədri Xəqani Məmmədov və "Qarabağ" klubunun vitse-prezidenti Tahir Gözəl iştirak ediblər.

Xatırladırıq ki, oyunu idarə edən çexiyalı hakimin qərəzli qərarı nəticəsində "Qarabağ"ın vurduğu qolun sayılmaması tərəfdarların və ictimaiyyətin böyük hiddətinə səbəb olub.

Ölkə.az mətbuat konfransında səsləndirilən fikrləri sizin diqqətinizə çatdırır:

Tahir Gözəl: "Dünən "Qarabağ" "İnter"i 1:0 uddu. Biz oyundan sonra bütün videoyazıları izlədik və gördük ki, qolda heç bir qayda pozuntusu olmayıb. Düzdür etirazlarımızın bir nəticəsi olmayacaq, amma boyunlarına alsınlar ki, dünən biz qalib gəlmişik".

Xəqani Məmmədov: "Dünənki qolda hakimlər komanda işi görə bilmədilər. Çoxları deyir Leroy Corc oyundan kənar vəziyyətdə idi, ancaq L. Corc oyundan kənar vəziyyətdə olsa belə qol sayılmalı idi. Qol qaydalar çərçivəsində vurulub. Əlimizdə sübut yoxdur, ancaq burada hakim səhv etmədi, qərəzli qərar verdi".

Səxavət Məmməd
Ölkə.az