Azərbaycan kuboku: yarımfinalçılar müəyyənləşdi

Bu gün Azərbaycan kubokunda 1/4 final mərhələsinin cavab oyunları keçirilib.

Ölkə.Az-ın qol.az-a istinadən məlumatına görə, baş tutacaq 4 oyundan sonra bütün yarımfinalçılar bəlli olub.

"Bakı" öz meydanında "Qarabağ"ı qəbul edib. Ağdam təmsilçisi ilk görüşdə rəqibinə 3:0 hesabı ilə qalib gəldiyi üçün bu oyun formal xarakteri daşıyırdı. Cavab görüşündə rəqibini 4:1 hesabı ilə məğlub edən Qurban Qurbanovun komandası yarımfinala vəsiqə qazanıb.

Maraqla gözlənilən oyunlardan biri AZAL və "Neftçi" arasında keçirilib. İlk görüşdə 0:0 hesabı qeydə alındığından cütün taleyinə məhz bu görüşdə aydınlıq gələcəkdi. Julius Vobayın matçın 19-cu dəqiqəsində cərimə zərbəsindən vurduğu qol "Neftçi"ni yarımfinala yüksəldib - 1:0.

"İnter" səfərdə "Xəzər Lənkəran"ın qonağı olub. Öz meydanında rəqibini 2:0 hesabı ilə məğlub edən "bankirlər" bu üstünlüyünü qorumağa çalışacaqdı. Lakin səfərdə "Xəzər Lənkəran"ı 3 cavabsız qolla məğlub edən "İnter" yarımfinala adlayıb.

Zaqatalada "Simurq" "Qəbələ" ilə münasibətlərinə aydınlıq gətirib. Səfərdə 3:0 hesabı ilə qələbə qazanan "Simurq" yarımfinala çox yaxın idi. Cavab matçında qapılara qol vurulmayıb və "Simurq" yarımfinala vəsiqə qazanıb.

Qeyd edək ki, bugünkü oyunlardan sonra bütün yarımfinalçılar müəyyənləşib. "Neftçi", "Qarabağ", "İnter" və "Simurq" klubları yarımfinalda oynamaq hüququ əldə edib.

13 mart

Azərbaycan kuboku, 1/4 finalın cavab oyunları

17:00. “Xəzər Lənkəran” – “İnter” - 0:3
Qollar: Asif Məmmədov, 24 (0:1), Arif Daşdəmirov, 74 (0:2), Əfran İsmayılov, 90 (0:3)
(İlk oyun - 0:2)
Hakimlər: Rəhim Həsənov, Zeynal Zeynalov, Rza Məmmədov, Ömər Paşayev
“Xəzər Lənkəran” mərkəzi stadionu.

17:00. “Simurq” – “Qəbələ” - 0:0
(İlk oyun - 3:0)
Hakimlər: Ramil Diniyev, Namiq Hüseynov, Kamran Bayramov, Munis Abdullayev
Əlavə köməkçi hakimlər: Fariz Yusifov, Etibar Həsənov
Zaqatala şəhər stadionu.

15:00. AZAL – “Neftçi” - 0:1
(İlk oyun - 0:0)
Qol: Julius Vobay, 19 (0:1)
Hakimlər: İnqilab Məmmədov, Vaqif Musayev, Rahil Ramazanov, Elman Musayev
Əlavə köməkçi hakimlər: Elvin Əsgərov, Əliyar Ağayev
AZAL Arena.

15:00. “Bakı” – “Qarabağ” - 1:4
Qollar: Mahir Mədətov, 8 (1:0), Vüqar Nadirov, 15 (1:1), Cavid Tağıyev, 57 (1:2), Vüqar Nadirov, 59, 70 (1:4)
(İlk oyun - 0:3)
Hakimlər: Xəlil Xəlilov, Azər Əsgərov, Mehman Mahmudov, Yaşar Abbasov
Əlavə köməkçi hakimlər: Vüsal Əliyev, Orxan Məmmədov
“Bakı” FK-nın təlim-məşq bazasının stadionu.

Ölkə.Az