\"Kim özünü apara bilməsə, \"Neftçi\"dən rədd olunacaq\"

“Neftçi”nin Müşahidə Şurasının sədri Çingiz Abdullayev Azərbaycan Premyer Liqasının 27-ci turunda "Bakı"ya qalib gəldikləri matçdan (2:0) sonra jurnalistlərin suallarını cavablandırıb.

Ölkə.Az-ın Qol.az-a istinadən məlumatına görə, o, bəzi maraqlı məqamlara toxunub

- Müşahidə Şurasının digər üzvlərindən fərqli olaraq komandanızın “Bakı” ilə oyununa sonda gəldiniz.

- Mənim xarici qonaqlarla görüşüm vardı. İstəyirdim onları da stadiona gətirim. Hesabın necə bitəcəyini bilmirdim. Oyun bitməmişdən öyrənmişdim ki, qalib gəlirik. Amma qonaqlar artıq getmişdilər. İstəyirik ki, "Neftçi" strukturunda dəyişiklik olsun. Fikirləşirəm ki, alman və ya ingilis klubu kimi bir komanda yarada bilərik.

- Digər işləriniz həddən artıq çox olur. "Neftçi"dəki işiniz onlara mane olmayacaq?

- Dünyada idman federasiyalarına həmişə nüfuzlu adamlar nəzarət edir. Ona görə ki, mütləq həmin adamın özü bu işlə məşğul olmalıdır. Konkret olaraq deyim. Şahmat Federasiyasının prezidenti Elman Rüstəmovun (Azərbaycan Respublikası Mərkəzi Bankın sədri – red.) işi məndən azdır? Taekvando və digər federasiyaları da misal çəkə bilərəm. Hər bir fedarasiya rəhbərinin özünün işi var. O demək deyil ki, mən gəlmişəm, gedib qapıçı duracam. Ya da meydana çıxıb futbol oynayacam. Xahiş etsəniz də bu mümkünsüzdür. Biz istəyirik ki, ilk növbədə "Neftçi"nin beynəlxalq arenada nüfuzunu qaldıraq. Onu indi də etmək olar. Bəzi tanışlarıma deyə bilərəm ki, bizi hansısa beynəlxalq turnirə dəvət etsinlər. Ancaq məsələ orasındadır ki, turnirə qatıldınsa, oynamalısan, qələbə qazanmalısan. Vaxtilə bizim hücumçuları SSR-yə yığmasına çağırırdılar. İndi onların adını çəkmək istəmirlər. Amma vaxtilə SSR yığma komandasında Markarov, Bonişevski, Kazbek Tuayev vardı.

- Bilirik ki, beynəlxalq əlaqələriniz güclüdür. Bu əlaqələrdən istifadə edib "Neftçi"ni brendə çevirmək üçün hansısa planlarınız var?

- Bu gün bizim icra direktorumuz düzgün qeyd etdi ki,”Azərbaycan dedektivini dünya brendi edə bildiksə, niyə futbolu edə bilməyək?“
Bizim idmanın müxtəlif sahələrində böyük uğurlarımız olub.Əsas məqsədimiz odur ki, bu inkişaf futbolda da olsun.

- Mövsümün başa çatmasına iki ay qalmış "Neftçi"də struktur dəyişikliyi oldu. Əgər bu dəyişiklik mövsümün sonunda uğurlu olmasa, qınaq obyekti olmayacaqsınız?

- Təbii ki, yox. Nəinki iki aya, iki ilə də komandanı dəyişmək olmur. Baxın, 2002-ci ildə Almaniya yığması ikinci yerə sahib olanda onlar çempion da olacaqlarını bildirdilər. Öz üzərlərində işlədilər və Dünya çempionu oldular. Biz də gənc futbolçularımıza güvənməli, yaxşı komanda yaratmalıyıq. Əminəm ki, sonda buna nail olacağıq.

- "Neftçi"də son vaxtlar belə bir strategiya var ki, komandaya yerli baş məşqçi və yerli futbolçular cəlb olunur. Siz də bu strategiyanın tərəfdarısınız?

- Əvvəlcədən deyim ki, Kriştiano Ronaldanu, Lionel Messini çağıra bilmərik. Məni vəzifəyə təyin edən kimi dedim ki,bəlkə, Bakı Olimpiya Stadionunu bizə verəsiniz. Dedilər verək, amma 12 minlik "Bakcell Arena"nı azarkeşlə doldurun, sonra oranı verək. Baxmalıyıq ki,ilk öncə futbolçuya nə qədər pul veririk? İşimizi düzgün qurmaq üçün nə qədər çalışırıq? Ronaldo alan maaşı bizim bütün futbolçular hamısı bir yerdə ala bilmir. Amma bir məsələdə var ki, o aldığından 10 qat çox kluba gəlir gətirir. Futbol ən çox gəlir gətirən idman növüdür. Necə olar ki, 100 minlərlə pul verəsən, amma nəticə olmasın?

- Berti Foqtsun altı il Azərbaycanda işləməsi və tutarlı uğurun olmaması sizi də narahat edirdi...

- Çox narahat edib. Berti Foqts oyunçu kimi xoşuma gəlirdi, amma fikirləşirdim ki, niyə belə oldu? Başqa alman məşqçi Yunanıstanı Avropa çempionu edə bilirsə, bizdə niyə alınmasın? Milli komandamızın Berti Foqtsun vaxtındakı oyunu bizə çox pis təsir edirdi. Yerli klublarda yalnız azərbaycanlı ola bilməz. Millidə isə azərbaycanlı olmalıdır. Birini, ikisini yalandan evləndirərik, amma hamısını milliləşdirə bilmərik.

- Beynəlxalq turnirlərdə çıxış etmək istədiyinizi dediniz. Konkret olaraq hansı turnirlərdən söhbət gedir?

- Birincisi Avropa turnirləri. Çünki bu turnirlərdə Avropanın hər ölkəsinə yer verirlər. Bir az qabağa getmək lazımdır. Maltanı udub sevinirik. Vaxtilə desəydilər ki, Malta üzərində qələbəyə belə sevinəcəyik, qəbirdəki futbolçular yerində qıvrılardı. Hesab etmirək ki, bu, bizim böyük uğurumuzdur. Çünki biz Maltaya qalib gəlməliydik.

- Klub üzvləri ilə görüşmək imkanınız olub?

- Bəli, bəziləri ilə görüşmüşəm. Bir neçə gündən sonra bütün oyunçularla da görüşəcəm.

- Rövnəq Abdullayev "Neftçi"nin səhmlərinin satışa çıxarılacağını bildirib. Səhmlərin satış planında xarici müştərilər var?

- Hesab edirəm ki, xarici müştərilər olmalıdır. Əgər pulu ilə iştirak edəcəksə, niyə də olmasın? Amma mən bunu dəqiq deyə bilmərəm. Bəlkə, dövlət buna icazə verməyəcək. Çünki bu, onların işidir. "Atletiko Madrid"də Azərbaycan reklam olunur. Belə də olmalıdır. Əsas orasıdır ki, bu ictimai qurum olsa, vergi verməyəcək. Əks təqdirdə vergi ödənilməlidir. Etiraf edək ki, böyük pullar xərclənilir, amma qazanılmır. Əgər hər oyuna 11 min azarkeş gəlsə, onda qazanc ola bilər. Biz, 9 milyonluq xalq bu stadionu doldura bilmirik. İşləmək lazımdır. Qoy, uşaqlar gəlib baxsınlar.

- Transfer məsələsində əsas məsuliyyət sizin üzərinizə düşəcək, yoxsa icraçı direktorun?

- Həm icraçı direktor, həm də digər peşəkarlar bu işlə məşğul olacaq. Sadəcə mən hamısına nəzarət edəcəm. Çünki bu şəffaf məsələ olmalıdır. Transferi hər yerdə klub rəhbəri həll edir. Çünki məşqçinin pul məsələsini idarə etmək icazəsi yoxdur. Biz transferə müəyyən məbləğdə pul veririksə, bunu hardansa almalıyıq. Tərifləmək üçün demirəm, amma ona görə nüfuzlu adam seçiblər ki, "Neftçi"yə kömək olsun.

- Ola bilər ki, sizin gəlişinizdən sonra yeni mövsüm üçün "Neftçi"nin büdcəsi artırılsın?

- Hesab edirəm ki, artırılmalıdır.

- Bu işdə sizə ən yaxın şəxs Elnur Məmmədov olacaq. Onun gənc və rəhbrəlikdə o qədər də təcrübəli olmaması sizi narahat etmir ki?

- Xeyr, pis işləsək, mən özüm dözməyəcəm, ərizəmi yazıb, çıxıb gedəcəm. Adam özü-özünə hörmət etməlidir. Yaxşı-pis 29 dilə kitablarım tərcümə olunub. Mənim qələmim də, kitabım da, adım da var. Heç kəs bunu mənim əlimdən ala bilməz.

- Yəqin Çingiz Abdullayev bugünədək yığdığı imici futbolda korlamaq fikrində deyil.

- Xeyr, Sovet dövründə Yazıçılar İttifaqının katibi olanda 171 evə qol çəkmişdim. Heç kimdən heç nə almamışam. Bir nəfər də bu haqda mənə nəsə deyə bilməz.

- Uğursuzluq mənasında demək istədik

- Nəinki mən, nə Bəhram Bağırzadə, nə digərləri bunu istəmir. Biz gəlirik ki, kömək edək. Mənə deyirlər ki, nəyinə lazımdır? Mən azərbaycanlıyam, öz xalqıma, komandama köməyim dəyə bilərsə, niyə bunu etməyim? Bacarmasam, deyərəm qoy başqası gəlsin. Heç birimiz bura özümüzü biabır etmək üçün gəlməmişik.

- Açıqlamanızda demişdiniz ki, "Neftçi"ni ilk növbədə bakılılar dəstəkləməlidir...

- Mən demədim, Rövnəq müəllim bildirdi ki, futbol yerliliyi sevir.

- Yəni reallıq belədir ki, Bakının mərkəzində bakılılar azdır.Bakı kəndlərində qalanların isə stadiona gəlməsi biraz çətindir.

- Razıyam, bəlkə də onlara avtobus vermək lazımdır. Yaxud da hər qəsəbədə fan-klub yaratmaq olar. Amma "Neftçi" əsasən Bakı ilə bağlıdır. Mən çalışacam ki, "Neftçi" tək Bakının yox, bütün Azərbaycanın komandası olsun. Həm də başqa komandalara nümunə etməliyik bu klubu. Çünki "Neftçi"nin həm də güclü sponsoru var. Heç bir komandanın bu cür varlı sponsoru yoxdur. Həm də bu komandanın uğurlu çıxışı olan tarixi var axı. O vaxt da "Neftçi" oynayanda stadion dolurdu.

- Sizcə, "Bakcell Arena"da azarkeşlərin az olması stadionun yerləşdiyi ərazidən irəli gəlmir ki?

- Mən Tofiq Bəhramov adına Respublika stadionunda da elə çox adam görmürdüm. Ola bilər ki, stadionun uzaq olması amilidə var amma belə gözləl stadion boş qalmamalıdır. Ona görə deyirəm ki, bəlkə avtobus tutaq, hər kəsi gətirək.

- Sadıq Sadıqov klub prezidenti kimi təcrübəsi sizlə müqayisədə daha çoxdur. Ondan işinizlə bağlı hansısa məsləhət almısınız?

- Bəli, ilk növbədə onun telefonunu almışam. İlk dəfə ona dedim ki, bizim haqda o qədər yazırlar ki, axırda bir-birimizi duelə çağıracağıq. Təbii ki, onun məsləhəti ilə də oturub işləməliyik. O, mənə kömək etməlidir.

- Nə vaxtsa "Neftçi"yə rəhbərlik edəcəyinizi gözləyirdiniz?

- Xeyr, mənə uşaqlıqda kimsə desəydi ki, xalq yazıçısı olacam, qətiyyən inanmazdım. Heç bu siyahıya da baxanda hərdən inana bilmirəm. Mən məşqçi deyiləm. Sadəcə bu komandaya kömək etmək üçün burdayam. Əsas məqsədimiz “Neftçi”ni beynəlxalq arenada tanıtmaqdır. Heç kim deməsin ki, mən hansısa şəxsi məqsəd üçün burdayam. Pul vacib deyil uğur olsa, hesab edərəm ki, nə isə qazanmışam.

- "Neftçi"nin nüfuzunun itirilməsində bir sıra səbəblər olub. Futbolçular tərəfindən edilən hərəkətlər klubun imicinə zərbə vurub. Bununla bağlı məlumatınız olub?

- Hamısından xəbərim var. Baxmayaraq ki, yazıçıyam, amma ilk peşəm hüquqşünasdır. Belə əhvalat olsa, söz verirəm ki, liberal olmayacam. Kim özünü apara bilməsə, həmin dəqiqə o insan buradan rədd olub gedəcək. Ona görə ki, futbol dünyada bir nömrəli idman növüdür. Futbola ilk növbədə cavanlar və uşaqlar gəlir. Futbolçu özünü meydanda heyvan kimi aparırsa, ona baxanda belə edəcək. Fair-play qaydaları var. Futbolçu dalaşsa, söyüşsə, hakimi təhqir etsə, artıq bu, futbol olmaz. Çalışacağıq ki, nümunəvi komanda olaq. Dava, söyüş, təhqir olsa, həmin adamlar komandada qalmayacaq. Mən sizə söz verirəm ki, belə bir hal olsa komandada ya mən qalacam, ya onlar. Mən sərt adamam.

- Ancaq futbol emosiya oyunudur...

- Dünya standartı var. Azarkeşin qışqırmasını başa düşürəm, amma təhqiri yox. İlk növbədə bu cinayət işidir. İkincisi də sən futbolçusan, sənə uşaqlar baxır. Mən bunu qəbul edə bilmərəm. Özünü apara bilməyən futbolçu meydana çıxmasın. Bu, teatr kimidir. Suarez rəqibini dişləyəndə bütün dünya bunu görmüşdü və hamı gülürdü. Ya da Maradonanın əli ilə qol vurması indiyədək danışılır.

- Bəhram Bağırzadə güldürən, siz isə düşündürən... Çətin olmayacaq ki?

- Sevinirəm ki, onun kimi bir insanla birgə işləyəcəm.

- Sizin "Neftçi"yə gəlməyiniz xəbəri yayıldıqda hər kəsi bir sual
düşündürürdü: "Yazıçı Çingiz Abdullayev hara, futbol hara?" Bunu eşitdikdə münasibətiniz necə oldu?

- Yazıçı kimi məndən nəsə yazanda soruşurdular ki, niyə cavab vermirsən? Mən onlara bunu deyirdim: "Abidə milçəyə cavab verməz".

- "Neftçi"dən kitab yazmağı düşünmürsünüz?

- Hələ düşünmürəm, axı mən dedektiv janrda yazıram. Deyirsiniz, gələn kimi dedektiv başlasın? Heç olmasa burda olmasın. Gələn kimi birini öldürüm? (gülür)

Ölkə.Az