"Qəbələ"də şok itki

Topaz Premyer Liqasının XXXIII turu çərçivəsində mayın 8-də “Sumqayıt”la qarşılaşacaq “Qəbələ” matçın hazırlıqlarına start verib.

“Qarabağ”la mayın 2-də evdə keçirilən XXXII turun oyunundan (1:1) sonra iki gün istirahətə buraxılan “qırmızı-qaralar” bu gün çalışmalarını bərpa edib. 

Əvvəl fiziki hazırlıq keçən komanda ardınca toplu çalışamlara üstünlük verib. Komandanın hazırlıqlarına 3 futbolçu qatılmayıb. Fizioterapiya kursu keçən Dodo və zədə səbəbindən müalicə olunan Ruslan Əmircanovla yanaşı, boğazında ağrılar olan komandanın bombardiri Cavid Hüseynov da məşqə qatılmayıblar.

Onlar “Sumqayıt”la oyunda da komandaya kömək edə bilməyəcək. Roman Qriqorçukun yetirmələri sabah Qəbələ şəhər stadionunda məşq keçəcək. Mayın 7-də komanda Bakıda bir araya gələcək.

Qeyd edək ki, mayın 8-də Sumqayıtdakı “Kapital Bank Arena”da keçiriləcək “Sumqayıt”la qarşılaşma saat 18:00-da başlayacaq.

Ölkə.Az