Azərbaycanlı idmançının çempionluğu ləğv edildi

Azərbaycanlı atlet Ramil Quliyevin Türkiyədə təşkil edilən turnirdə qazandığı çempionluq ləğv edilib. 

Sparta Süleyman Dəmirəl Universitetinin ev sahibliyi etdiyi ənənəvi turnirin nəticələri hesaba alınmayıb.

Quliyev 100 m məsafəyə qaçışda qızıl medal almaqla yanaşı, özünün sahib olduğu Türkiyə rekordunu 0,08 saniyə yaxşılaşdırmasına (10,12) baxmayaraq, Beynəlxalq Atletika Federasiyası (IAAF) qanun pozuntusuna yol verildiyini aşkarlayıb.

Belə ki, 100 m məsafəyə qaçış üçün 52 idmançı müraciət edincə, digər yarışlara vaxt azlığı yaranıb. Yerli federasiya isə ilk mərhələlərin tez başa çatması üçün anormal addım atıb və 6 cığırlı pistdə cığırları daraldaraq, daha bir xətt çəkib. Nəticədə bir dəfəyə 6 yox, 7 atlet mübarizə aparmalı olub.

Bundan xəbərdar olan IAAF rəhbərliyi yarışın nizamnaməyə uyğun olmadığını qərara alıb. Həmçinin start xəttinin də 7 sm qısa olduğu üzə çıxıb.

Kütahya Dumlupınar Universitetində təhsil alan Ramil Quliyev qazandığı bu uğurla Rio-de-Janeyro Olimpiasının normativini ödəməklə yanaşı, Cənubi Koreyada keçiriləcək Universiadada iştirak hüququ da əldə etmişdi. Lakin nəticələrin ləğv edilməsi həmyerlimizin arzusunu ürəyində qoyub. (apasport)

Ölkə.Az