İdmançımız qızıl medal qazandı

Qəbələdə ulu öndər Heydər Əliyevin xatirəsinə həsr edilən atıcılıq növləri üzrə yarışlara artıq start verilib. Elə ilk gündə azərbaycanlı iştirakçı Rəna Ələsgərova fərqlənib.

Qəbələdə keçirilən olimpiya atıcılıq növləri üzrə II Beynəlxalq Qran-pri yarışlarında iştirak edən azərbaycanlı iştirakçı Rəna Ələsgərova fəxri kürsünün birinci pilləsinə yüksəlib.

Stend atıcılığında rəqiblərini geridə qoyan idmançımız qızıl medala sahib çıxıb. Gərgin keçən mübarizə şəraitində R. Ələsgərova finalda finlandiya və küveytli rəqiblərindən daha üstün olduğunu sübut edib. Mükafatlandırma mərasimində qaliblərə medal və pul mükafatları təqdim olunub. Qeyd edək ki, bu növ üzrə mübarizəyə qatılan 4 qadın idmançımızdan ikisi final mərhələsinə adlaya bilib.

Ümumi mükafat fondu 96,5 min ABŞ dolları olan turnirdə 17 ölkədən 150-yə yaxın idmançı iştirak edir. Yarışlara mayın 24-də yekun vurulacaq. (Region TV)

Ölkə.az