AVRO-2020: İsveç və İspaniya 1/8 final mərhələsində

"Report"un məlumatına görə, III turda İspaniya Slovakiya ilə üz-üzə gəlib.

Matçın 30-cu dəqiqəsində slovakiyalı qapıçı Martin Dubravka avtoqol müəllifi olub. 45+3-cü dəqiqədə Emerik Laport, 56-cı dəqiqədə Pablo Sarabiya, 67-ci dəqiqədə isə Ferran Torres rəqibi məyus edib. 71-ci dəqiqədə isə Yuraj Kuçka topu öz qapısına vurub. İspaniya 5 - Slovakiya - 0.

Xallarının sayını 5-ə çatdıran İspaniya qrup ikincisi kimi 1/8 final mərhələsinə çıxıb. 1/8 finalda İspaniya Xorvatiya ilə qarşılaşcaq.

Qrupun digər görüşündə İsveç Polşa ilə qarşılaşıb. İsveçin heyətində Emil Forsberq 2 və 59-cu dəqiqədə fərqlənib. Robert Levandovski 61-ci dəqiqədə fərqi azaldıb, 84-cü dəqiqədə isə bərabərlik qolunu vurub. 90+4-cü dəqiqədə Klasson oyunda son nöqtəni qoyub. İsveç 7 xalla qrup lideri kimi 1/8 finala vəsiqə qazanıb. Bu raundda onun rəqibi daha sonra bəlli olacaq.

Slovakiya E qrupunu 3 xalla üçüncü, Polşa isə 1 xalla 4-cü pillədə bitirib.