\"Qarabağ\"dan pivə məsələsi ilə bağlı AÇIQLAMA - Qurbanovu cərimə gözləyir?

Xəbər verdiyimiz kimi, “Qarabağ”ın baş məşqçisi Qurban Qurbanov “Bazel”lə matçdan sonra keçirilən mətbuat konfransında pivə şüşələrinin qarşısından götürülməsini istəyib. Onun bu istəyi sosial şəbəkə istifadəçiləri arasında müzakirələrə səbəb olub.

“Qarabağ”ın mətbuat katibi Gündüz Abbaszadə “Ölkə.Az”a açıqlamasında pivə şüşələrini şəxsən özü götürdüyünü bildirib. O, pivələrin masadan götürülməsinin səbəbini belə izah edib:
“Səbəb sadəcə budur ki, Q.Qurbanov spirtli içkinin əyləşdiyi masanın üzərində olmasını istəməyib. Bu davranışın Ronaldonun hərəkətinə bənzədilməsinin tərəfdarı deyiləm. Unutmayaq ki, “Bayern-Münhen” oyunçuları çempionluğunu hər zaman əyalətin məşhur pivəsini içərək qeyd edirlər. Müsəlman olan Frank Riberi vaxtilə bunun qəti şəkildə əleyhinə olub. Bundan başqa “Mançester”da oynayan futbolçu Pol Poqba eyni il masanın üzərindən pivənin götürülməsini tələb edib. 

UEFA da insanların dini baxışlarına hörmətlə yanaşır və hər zaman bunu dilə gətirirlər ki, onlar üçün önəmli olan insanların baxışları, yarışın keçirildiyi ölkənin qanunlarıdır. Bu məsələdə də hər hansı bir cəzadan, cərimədən söhbət gedə bilməz. Sponsor olsa da, insanların istəyi onlar üçün önəmlidir”. 

G.Abbaszadə həmçinin söyləyib ki, Avropada məşhur olan mərc şirkətlərindən birinin dünənki oyunun sponsorlarından biri olmasına baxmayaraq onun reklamına icazə verilməyib:
“Bizim ölkənin qanunlarına görə başqa mərc şirkətləri reklam oluna bilməz. Buna görə də Həmin sponsorun adı çıxarılıb”.

Billurə Yunus