“Bunu bir dəfə etmişik”
Sabah Azərbaycan kubokunun finalında “Qarabağ” və “Neftçi” üz-üzə gələcək.
Oyundan öncə komandaların mətbuat konfransı keçirilib.
“Qarabağ”ın baş məşqçisi Qurban Qurbanov jurnalistlər önünə çıxıb: “Düşünürəm ki, hamımız gərgin və maraqlı oyun izləyəcəyik. Belə həlledici oyunun gedişatında dəyişikliklər ola bilər. Hər iki komandanın istəyi çoxdur. Təəssüf ki, qalib bir komanda olacaq”.
Qurban Qurbanov 1996-cı ilin finalındakı məğlubiyyətin qisasını almaq haqqında düşünmədiklərini bildirib: “İstərdik ki, bu turnirin qalibi olaq. O dövr başqa dövr idi, bu gün başqa dövr. Sadəcə qələbə qazanmaq istəyirik”.
Gənc mütəxəssis heyəti müəyyənləşdirdiyini sözlərinə əlavə edib: “Heyəti müəyyələşdirmişəm. Bildiyiniz kimidir (gülür)”.
“Flavinyonun oynamamağı oyununza təsir edəcəkmi?” sualına Qurbanov belə cavab verib: “Rəqib istəkli komandadır. Flavinyo həmişə komandalara problem yaradıb. O, yaxşı futbolçudur. Amma belə matçlarda bir nəfərin yoxluğu təsir etməyəcək. Bir oyundan ibarət matçlar başqa cür olur. Hər iki komanda istəkli olacaq. İki güclü komanda üz-üzə gəlir. İstərdim ki, final oyunlarında bütün qırmızı vərəqələr ləğv olunsun. Hər kəs meydana çıxa bilsin”.
Ağdamlıların çalışdırıcı penaltilər üzərində 1 dəfə məşq etdiklərini deyib: “Penaltilər üzərində bir dəfə məşq etmişik. Çünki çox məşq etməyin yaxşı olmadığını düşünürəm. Məsələn, bir futbolçu oyundan sonra penaltilərdə məşq zamanı vura bilmədiyi penaltini yadına salıb səhvə yol verə bilər”.
Qurbanov Topaz Premyer Liqasının 2014/2015 mövsümünün ötənilkinə nisbətən zəif olmasının Çempionlar Liqasında oyunlara təsir edib-etməməsinə belə aydınlıq gətirib: “Bu il yanvardan bu tərəfə əlimizdə futbolçu az oldu. Ona görə lazımi anda dəyişikliklər edə bilmirdik. Heyətimiz kasad idi. Amma futbolçular bacardıqlarından artığını etdilər. Bu mövsüm çempionatdakı limit gənc futbolçuların inkişafına təkan verdi. Çempionatın səviyyəsinin Avropa oyunlarına təsir edib-etməyəcəyini isə zaman göstərəcək”.
Məşqçi müqaviləsi bitən futbolçularla bağlı da danışıb. O, Muarem Muaremin “Əskişəhərspor”la razılaşmasından xəbərsiz olduğunu deyib: “Müqaviləsi bitən oyunçularla danışıq aparmamışıq. Hələlik bunu kənara qoyub kubokun finalını düşünürük”. (qafqazinfo)
Ölkə.Az
