“Azərbaycanlılıq qanımızda var, ermənilərin cavabını necə lazımdırsa, vermişik” - Dünya çempionu ilə MÜSAHİBƏ
Müxtəlif xarici ölkələrdə Azərbaycanı təmsil edən, bayrağımızı dalğalandıran xeyli sayda həmvətənlərimiz yaşayır. Onladan biri də MMA üzrə Avropa və Dünya çempionu Elgün Xanoğlanoğludur.
Ölkə.Az Elgün Xanoğlanlı ilə müsahibəni təqdim edir.
- Əvvəlcə özünüz və karyeranız haqqında qısaca məlumat verərdiniz.
- 1992-ci ildə Füzuli rayonunun Əhmədbəyli kəndində doğulmuşam, məcburi köçkün həyatı yaşamışıq. Ailəmlə əvəlcə İmişliyə, daha sonra Bakıya üz tutmuşuq. Karyeramla bağlı artıq 6 ildir ABŞ-da yaşayıram.
MMA üzrə dünya və Avropa çempionuyam, dünya kəmərinin, dünya kubokunun sahibiyəm. 100-dən artıq medalım var. Artıq 5-ci professional döyüşüm olub. 1 məğlubiyyətim var.
Heç bir maneə bizi hədəfimizdən geri çəkə bilməz. Nə olursa olsun, bizim bir məqsədimiz var, dünya arenalarında bayrağımızı dalğalandırmaq.
- Qarabağda, Füzulidə doğulmusunuz. Torpaqlarımız işğaldan azad olunanda nə hisslər keçirdiniz? Həmin dövrdə ölkədə idiniz, yoxsa ABŞ-da?
- Füzulidən olduğum üçün Qarabağın sevinci bizim üçün çox böyük uğur idi. Müharibədə vuruşmaq mənim böyük arzum idi. Vətənim üçün hər şeyi etməyə hazır idim. Hər yerə yazdım ki, gəlmək istəyirəm. Dedilər ki, gəlsən də, ön cəbhəyə buraxmazlar. Dedilər, ən yaxşısı, orada təşkilatçılıq elə. ABŞ-dakı azərbaycanlılarla birgə əlimizdən gələni etmişik. Təəssüf ki, vuruşmaq mənə qismət olmadı.
44 gün ərzində ABŞ-da yaşayan azərbaycanlılar gördü ki, mən əsgərlərimiz, qazilərimiz üçün nələr etdim. Həmin dövrdə keçirilən bütün tədbirlərdə iştirak etdim, ordumuz üçün maddi dəstək topladım. Bizim gücümüz ancaq buna çatırdı.
Onsuz da Azərbaycanın əsgəriyik. Harada olmağımızın fərqi yoxdur. Həmişə hər yerdə vətənimiz üçün vuruşmağa hazırıq. Biz də bacardığımız qədər rinqlərdə, dünya arenasında bayrağımızı qaldırıb ölkəmizin adını ucaldırıq.
- Yəqin ki, bu 6 ildə ABŞ-da dostlar xeyli sayda dost qazanmısınız. ABŞ-lı dostlarınız necə, sizə dəstək oldularmı? Bu müharibə haqqında onlar nə düşünürdülər?
- ABŞ-da güclü təbliğat apardığımız, öz torpağımız uğrunda vuruşduğumuzu başa salmışdıq. Onlar da bzi dəstəkləyirdilər. 92-ci ildən bəri başımıza gələnləri onlara da izah etmişdik. Artıq bilirdilər ki, bu, haqq savaşıdır. Mənim tandığım ABŞ-lıların hamısı bizi dəstəkləyirdilər.
- Vətən müharibəsi dönəmində həmyerlilərimiz orada dəstək aksiyaları keçirirdi. Ermənilərlə toqquşmalar da olmuşdu. Bəs siz orada hansısa erməni ilə mübahisə yaşamısınızmı?
- Vətən müharibəsi zamanı bütün aksiyalarda iştirak etmişəm. Ermənilərin qarşısına necə lazımdırsa, çıxıb cavablarını vermişik. Sadəcə, Nyu Yorkda yaşadığım üçün Kaliforniyada olan hadisələrdə iştirak edə bilmədim. Lakin Nyu York ərazisinə yaxın bütün ştatlardakı aksiyalarda iştirak etmişəm.
- ABŞ-da olan ən çox nədən ötrü darıxırsınız?
- Təbii ki, ən çox anamın yeməkləri üçün darıxıram. Onun yeməklərinin dadını heç bir şey verə bilməz. Karyerama görə orda yaşayıram. ABŞ vətəndaşı deyiləm, amma rezidentəm. Vətəndaşlıq üçün hələ təsəlmirəm. İstəyirəm ki, valideynlərimi də yanımda aparım, razılaşmırlar. “Vətən” deyib dururlar.
- Azərbaycan kişiləri adətən mühafizəkar xarakterə malik olur. Siz ABŞ-a getdikdən sonra ABŞ müasirliyinə yiyələnmisinizmi?
- Biz bunu dəyişə bilmərik, azərbaycanlılıq bizim qanımızda var. Bir də ki, bizim insanımızın səmimiyyəti ailəyə bağlılığı ABŞ insanında yoxdur. Ona görə də fikirləşirəm ki, gələcəkdə azərbaycanlı bir xanımla ailə həyatı quraram.
- Bildiyim qədərilə hazırda Azərbaycandasınız. Gəlmişkən azad olunmuş ərazilərə də getməyi düşünürsünüzmü?
- Tunisdəki çempionatda Azərbaycanı təmsil edirdim. Çempionat yekunlaşdıqdan sonra 2 həftəlik Azərbaycana gəldik.
Ötən ilə qədər məcburi köçkün idik. Ali Baş Komandanımız artıq bu statusu üzərimizdən götürdü. Bu günümüzə çox şükür. Gəlmişkən Şuşaya və azad olunmuş digər ərazilərə getməyi çox istəyərdim.
Billurə Yunus
