Klublarımızın mərhələ adlamaq şansları nə qədərdi?
Məlum olduğu kimi, avrokuboklarda ölkəmizi təmsil edəcək klublarımızın rəqibləri bəlli olub. Əməkdar məşqçi, AFFA Məşqçilər Komitəsinin sədri Vaqif Sadıxov Ölkə.Az üçün təmsilçilərimizin şanslarını dəyərləndirib. Əvvəlcə Avroliqada mübarizə aparan komandalarımızın rəqibləri haqda.
Mütəxəssis "Dinamo" (Gürcüstan) - "Qəbələ" (Azərbaycan) cütü barədə bunları deyib:
"Bu, çox maraqlı oyun olacaq. Çünki çoxdandır Gürcüstan klublarıyla rəqib olmurduq. "Qəbələ"nin formalaşan bir heyəti və oyun modeli var. Çempionatın ikinci yarısında keçirdikləri oyunlar göstərdi ki, komanda Avroliqada da müsbət nəticə əldə edə bilər. İlk oyunun səfərdə keçirilməsi də bizim üstünlüyümüzdür. Digər tərəfdən təmsilçimiz hazırlıqlara hamıdan tez başlayıb və hazırlıq planlı şəkildə davam edir. İnanıram ki, maraqlı oyun olacaq və "Qəbələ" mərhələni adlayacaq".
V.Sadıxov hesab edir ki, "Laçi" (Albaniya) - "İnter" (Azərbaycan) cütlüyü də maraqlı mübarizə vəd edir. Amma:
"Albaniya ilk baxışdan Avropanın güclü futbol ölkələrindən hesab edilmir. Amma təkcə "Skenderbeu"nu yada salsaq görərik ki, bütün ölkələrdə futbolu bacarırlar. Bu oyuna ciddi hazırlaşmalıyıq. "İnter"in rəhbərliyi əllərindən gələni edir ki, güclü komanda formalaşsın. Komandanın yenilənməsi təsirsiz ötüşməyəcək. Belə olan halda şanslar bərabərləşir. Çox istərdim ki, belə bir durumda "İnter" özünü yaxşı tərəfdən göstərsin".
"Mladost" (Monteneqro) - "Neftçi" (Azərbaycan) cütü haqda mütəxəssisin dedikləri:
"Bu, bizə tanış olan komandadır və onlarla görüşmüşük. Sırf təsadüf nəticəsində UEFA-nın qərarıyla məğlub olmuşuq. Onlara "borcumuzu" qaytarmalıyıq. Düzdür, "Neftçi"nin durumu yaxşı deyil. Amma "Neftçi" həmişə "Neftçi"dir. Heyətindən, rəqibindən asılı olmayaraq gücünü Avroliqada da nümayiş etdirib bizi sevindirəcək. İlk oyunun səfərdə olması bizim üstünlüyümüzdür. Orada etibarlı oynayıb evdə nəticə əldə etmək olar".
Əməkdar məşqçi Çempionlar Liqasındakı yeganə təmsilçimiz "Qarabağ"ın Monteneqro "Rudar"ı ilə münasibətlərə hansı şəkildə aydınlıq gətirəcəyi barədə də danışıb. Onun fikrincə, rəqib güclü olsa da, Ağdam təmsilçisi cütün favoritidir:
"Hesab edirəm ki, "Qarabağ"a yetərincə güclü rəqib düşüb. Amma yaddan çıxarmayaq ki, çox güclü "Qarabağ" komandamız var. İlk mərhələdə Ermənistan "Mika"sını məğlub etmiş "Rudar"ı keçməklə Ermənistan təmsilçisindən üstün olduğumuzu da sübut edə bilərik. Futbolumuz Avropada "Qarabağ"la tanınır. Komandamızda yeni bir heyət formalaşır. Ancaq küstünlüyümüz rəqibdən asılı olmayaraq, kollektiv oyun oynamağımızdır. Çox güman ki, Qurban Qurbanovun komandası ötənilki haqsızlığa artıqlaması ilə cavab verəcək və ən azı qrup mərhələsinədək irəliləyəcək"
İntiqam VALEHOĞLU
Ölkə.az
