Nazir: Həmin adamlar Azərbaycan dövlətinə, onun milli maraqlarına qarşı çıxırlar
Yay Olimpiya Oyunlarını keçirmək üçün müəyyən standartlar mövcuddur və bunun təlimatları da var. Ancaq qitədə ilk dəfə keçirilən Avropa Oyunlarının standartları yox idi. Bu standartları Azərbaycan müəyyənləşdirdi. Biz təlimatları özümüz yazdıq və gələcək Oyunlar üçün hazır meyarlar yaratdıq.
Ölkə.Az-ın məlumatına görə, bu sözləri “Azərbaycan” qəzetinə müsahibəsində Azərbaycanın gənclər və idman naziri Azad Rəhimov bildirib.
İdmançılarımızın qazandıqları medal sayından danışan nazir, bunun gözlənilməz olduğunu bildirib:
“Bu, gözlənilməz uğur idi. Hər kəs proqnoz verməyə çalışırdı. Ancaq nəticə çox müsbət oldu. Azərbaycan idmançıları ümidləri həqiqətən doğrultdular. Çünki bu yarış Azərbaycanda keçirilirdi və atletlərimiz ürəklə çıxış etdilər. Yeni rekordlar müəyyənləşdi”.
Oyunlar ərəfəsində Azərbaycana qarşı aparılan kampaniyadan danışan nazir bildirib ki, Azərbaycanda I Avropa Oyunlarının keçirilməsi ölkəmizin nüfuzunun artdığını bir daha sübuta yetirdi.
“İdmanda olan nailiyyətlər də göz qabağındadır. Azərbaycan qazandığı medalların sayına görə Avropanın ən güclü 2-ci ölkəsi oldu. Bunları danmaq mümkün deyil. Bu sahədə həyata keçirilən siyasətin nəticəsidir ki, bu gün Azərbaycanda idmanla məşğul olmaq böyük amilə çevrilib. Avropa Oyunları Azərbaycanın milli, dövlətçilik maraqları baxımından böyük əhəmiyyətə malik idi.
Azərbaycanın qüdrətli dövlət kimi dünyada öz layiqli yerini tutması antiazərbaycançı şəbəkədə böyük narahatlıq yaradıb. Kimsə I Avropa Oyunları ilə bağlı cəmiyyətdə mənfi rəy formalaşdırmağa çalışırsa, demək ki, o, Azərbaycan dövlətinə, onun milli maraqlarına qarşı çıxır.
Bu məsələ ilə bağlı fikir bildirənlər idman aləmindən uzaq olanlardır”.
Nazir həmçinin qeyd edib ki, Avropa Oyunlarında istifadəyə verilən idman obyektləri 2017-ci ildə ölkəmizdə keçiriləcək IV İslam Həmrəyliyi Oyunlarına da yetərli olacaq:
“Bir sözlə, bu nüfuzlu yarış üçün yeni idman infratsrukturunun yaradılmasına ehtiyac yoxdur”.
Ölkə.Az
