Finalda vurulan qollar, ən yaxşı oyunçular - VİDEO

Qətərdə keçirilən dünya çempionatının ən sərrast futbolçusu bəlli olub.

"Ölkə.Az" xəbər verir ki, bu ada Fransa millisinin hücumçusu Kilian Mbappe sahib çıxıb.

O, qol sayına görə argentinalı Qabriel Batistuta və ingiltərəli Qari Linekeri geridə qoyub, almaniyalı Yurgen Klinsmana isə çatıb.

Argentina millisinin kapitanı Lionel Messi isə final matçının ən yaxşı futbolçusu seçilib.

Bundan əlavə, K.Mbappe DÇ-2022-nin finalında Argentina ilə görüşdə dubl etməklə tarixə düşüb.

DÇ-2018-ci ilin finalında Xorvatiyaya (4:2) qol vurmuş futbolçu dünya rekordunu təkrarlayıb.

Onun kimi dünya çempionatlarının finallarında 3 qol vurmuş futbolçular bunlardır: Vava, Pele (hər ikisi Braziliya), Ceff Hörst (İngiltərə) və Zinəddin Zidan (Fransa).

Həmçinin bildirək ki, Argentina millisinin kapitanı Lionel Messi dünya çempionatında ən çox oyun keçirən almaniyalı sabiq futbolçu Lotar Mateusun rekordunu qırıb.

Messi Argentina yığmasının heyətində Qətərdə keçirilən dünya çempionatının finalında Fransaya qarşı oynamaqla mundiallarda sayca 26-cı oyununa çıxıb.

O, Fransa ilə matçın 23-cü dəqiqəsində dünya çempionatında oynadığı dəqiqələrə görə (2217) İtaliyanın sabiq mərkəz müdafiəçisi Paolo Maldinini (2216) keçərək rekorda imza atıb.

Messi həmçinin dünya çempionatının qrup mərhələsində və bütün pley-off oyunlarında qol vuran ilk futbolçu olub. 35 yaşlı hücumçu Fransa ilə finalda penaltidən hesabı açıb. Bundan əvvəl o, Səudiyyə Ərəbistanı (qrup mərhələsi, 1:2), Meksika (qrup mərhələsi, 2:0), Avstraliya (1/8 final, 2:1), Niderland (1/4 final, 2:2; penaltilər – 4:3) və Xorvatiya (1/2 final, 3:0) ilə oyunlarda fərqlənib.