\"Qarabağ\"ın növbəti mövsümdən büdcəsi artır? - Açıqlama
Cari mövsümü “Qarabağ” klubu üçün maliyyə baxımından uğurlu saymaq olar. Ağdam təmsilçisi bu mövsüm 28 milyon manatdan çox gəlir əldə edib.
Bu məbləğin 5 milyon ABŞ dolları Kadi Borgesin, 1 milyon 600 min avrosu Vadjinin satışından qazanılıb. Gəlirin qalan hissəsi isə komandanın avrokuboklardakı uğurlu çıxışının bəhrəsidir. (mənbə: Sportline.az)
Artıq neçə mövsümdür ki, "Qarabağ" büdcəsini UEFA-nın hesabına zənginləşdirməyi ənənəyə çevirib.Yuxarıda qeyd olunduğu kimi cari mövsümdə də "köhlən atlar" ali futbol qurumundan samballı mükafat ala bilib.
Qeyd edək ki, təmsilçimiz Avropa Konfrans Liqasında mübarizəni davam etdirir və bu məbləğin artacağı şübhəsizdir.
Maraqlıdır, növbəti futbol ilində Ağdam təmsilçisinin büdcəsində artım olacaqmı? Sualımızı klubunun icraçı direktoru Əmrah Çəlikələ ünvanladıq.
Əmrah bəy Fanat.Az-a açıqlamasında gəlirlərini təsdiqlədi: "Bəli, demək olar ki, bu qədər gəlir əldə etmişik. Bu, həm futbolçu satışından, həm də avrokuboklarda uğurlu çıxışlarımız sayəsində əldə etdiyimiz gəlirlərdir. Büdcənin artırılmasına gəlincə, bu məbləğ "Qarabağ"ın illik xərclərini qarşılamır. Büdcəmizin nə qədər olacağı klubdaxili sirrdir amma istənilən vaxtı vəziyyətə, qarşıdakı xərclərə uyğun büdcəyə dəyişiklik edə bilirik. Onu da qeyd edim ki, gələn mövsümdən, yəni bu ildən klubumuz uşaq futboluna da investisiya yatırmaq fikirindədir. Uşaq futbolunun inkişafı yönündə strukturun təkmiləşdirilməsində daha çox maliyyə nəzərdə tutulub. Hələlik, builki planımız belədir".