\"Çelsi\" argentinalı ulduzu transfer etdi - Rekord məbləğ

İngiltərənin “Çelsi” klubu “Benfika”nın və Argentina millisinin yarımmüdafiəçisi Entso Fernandesi transfer edib.

 

Fanat.Az xəbər verir ki, bu barədə Portuqaliya Qiymətli Kağızlar Bazarı Komissiyasının saytında məlumat yayılıb.

 

"Zadəganlar"a 121 milyon avroya başa gələn transfer İngiltərə Premyer Liqasının tarixində rekord olub. Entso müddəti 2031-ci ilin yayına qədər olan anlaşmaya qol çəkib.

 

Bundan əvvəl rekord “Aston Villa”dan ingilis yarımmüdafiəçisi Cek Qrilişi 113 milyon avroya satın alan “Mançester Siti”yə məxsus idi.

 

Qətərdə keçirilən 2022-ci il DÇ-də Entso Fernandez milli komandanın tərkibində çempionluq titulunu qazanıb və həmçinin turnirin ən yaxşı gənc oyunçusu mükafatına layiq görülüb.

 

Cari mövsümdə yarımmüdafiəçi Portuqaliya çempionatında 17 oyun keçirib, bu matçlarda 1 qol vurub və 5 məhsuldar ötürmə edib.