De Byazi səhvlərini düzəldir: Heyətdə dəyişikliklər olacaq

Azərbaycan millisi AVRO-2024-ün seçmə mərhələsinin II turunda İsveçə qarşı Avstriya matçı ilə müqayisədə dəyişikliklərlə başlayacaq.

Oxu.Az saytının əldə etdiyi məlumata görə, baş məşqçi Canni De Byazi ilk görüşdəki səhvlərindən nəticə çıxarıb.

Bu dəfə o, qapıda gənc Yusif İmanovu “oda atmayacaq”. “Çərçivə” ya Emil Balayevə, ya da Səlahət Ağayevə həvalə ediləcək. Güman ki, üstünlük Ağayevə veriləcək.

Daha bir dəyişiklik müdafiənin mərkəzi ilə bağlı olacaq. Avstriya qarşısında səhvlər edən Bəxtiyar Həsənalızadə bu dəfə startda başlamayacaq. Onu Anton Krivotsyuk əvəzləyəcək.

Yarımmüdafiədə zədəli Eddi İsrafilovu kimin əvəzləyəvəyi taktiki seçimdən asılı olacaq. Milli müdafiəni düşünsə, Elvin Camalov, hücum etmək istəsə, daha yaradıcı Aleksey İsayev ilk “11-lik”də olacaq. Komandanın güclü rəqib qarşısında əsasən qapının təhlükəsizliyini düşünəcəyi nəzərə alındıqda Camalovun oynaması daha realdır.
Hücum xəttində isə dəyişiklik gözlənilmir.

Solnadakı “Friends Arena”da keçiriləcək İsveç - Azərbaycan görüşü Bakı vaxtı ilə 22:45-də start götürəcək.