“Kəpəz”in yeni baş məşqçisi bəlli oldu

“Kəpəz”in baş məşqçisi Tərlan Əhmədovun istefaya göndərildiyi barədə məlumat vermişdik. Artıq yeni baş məşqçi də bəllidir.

Bizim.Media-nın əldə etdiyi məlumata görə, Gəncə klubunun yeni baş məşqçisi Azər Məmmədov olacaq.

Onun köməkçiləri isə Gəncə futbolunun tanınmış simalarından olan Etibar İbrahimov, Xaliq Mərdanov, Vaqif Vəliyev və qapıçılar üzrə məşqçi Tariyel Hüseynov olacaq. Amma burada bir məqam var. Azər Məmmədovun pro kateqoriyası olmadığına görə komandanın baş məşqçisi sənədlərdə Etibar İbrahimov göstəriləcək.

Yəni bir növ “Şamaxı”da Cavid Hüseynovun kağız üzərində olmasa da, klubun baş məşqçisi olması kimi.

Qeyd edək ki, İbrahimov son illər ölkə xaricində çalışıb. Hindistanın 17 yaşlı yığmasında, həmçinin Almaniyanın “Ayntraxt” klubunun Çində fəaliyyət göstərən akademiyasında işləyib.