Məhəmməd Abdullayev Avropa Oyunlarına qələbə ilə başladı
Məhəmməd Abdullayev Avropa Oyunlarında ilk döyüşünü qələbə ilə bitirib
"Ölkə.az" xəbər verir ki, Azərbaycan boksçusu Məhəmməd Abdullayev Polşada keçirilən III Avropa Oyunlarına qələbə ilə başlayıb. +92 kq çəkidə mübarizə aparan dünya çempionatının mükafatçısı 1/16 finalda Uğur Aydemirlə (Türkiyə) qarşılaşıb.
Döyüşdə ilk raundu rəqib qazansa da, Abdullayev növbəti hissədən təşəbbüsü ələ alıb. İkinci raundda üstün olan boksçumuz üçüncü hissədə vaxtından əvvəl tam üstünlüklə qalib gəlib.
O, 1/8 finalda ilk mərhələdən azad olan gürcüstanlı Nikolos Beqadze ilə döyüşəcək. Görüş iyunun 27-də olacaq.
Qeyd edək ki, bu gün Abdullayevdən öncə Sərxan Əliyev (71 kq) də 1/8 finala vəsiqə qazanıb.
