\"Bu, Azərbaycan üçün böyük qələbədir\"

“Bu, Azərbaycan üçün böyük qələbədir”.

"Ölkə.az" xəbər verir ki, bunu Azərbaycan Muay-Tay Federasiyasının prezidenti Araz Musayev millinin 3 üzvünün Polşada təşkil edilən III Avropa Oyunlarında yarımfinala vəsiqə qazanaraq, medalı təmin etməsi barədə jurnalistlərə açıqlamasında deyib.

Federasiya rəhbəri onlara dəstək verən Gənclər və İdman Nazirliyinə təşəkkürünü bildirib: “Yarışda artıq 3 medalı təmin etmişik. Yola davam edirik. Gənclər və idman naziri Fərid Qayıbovun gənclərə diqqət və qayğısı, nazirin müavini Mariana Vasilevanın onları birbaşa nəzarətdə saxlaması nəticəsində burada qələbələr qazanırıq. Azərbaycan qalib ölkədir, idmançısı da qalib olmalıdır”.

O, idmançıların gənc olmalarını xüsusi vurğulayaraq, onlardan gələcəkdə daha parlaq zəfərlər gözlədiklərini söyləyib: “Avropa Oyunlarına 4 idmançı ilə qatılmağımız onların yeni nəslin nümayəndələri olmalarından qaynaqlanır. Hələ cəmi 17 yaşları var. İdmançılarımızın gələcəkdə uğurlu nəticələri hələ çox olacaq. İnanıram ki, Azərbaycanın bayrağını qaldıracaq, himnini səsləndirəcəklər”.

Araz Musayev qadınlar arasında 63,5 kq çəki dərəcəsində Emili Rzayevanın 1/4 finaldakı rəqibi Nora Kornellinin (Fransa) çəkiyə çıxmamasının səbəbini də izah edib: “Emilinin rəqibi olan fransalı çox güclü idi və reytinq döyüşlərində iştirak edib. Onun artıq çəkisinin olduğunu dərhal hiss etmişdik. Buna görə çəkiyə gəlməsini tələb etdik. Həmin idmançı da döyüşdən imtina etdi”.

Qeyd edək ki, Azərbaycan muay-tay yığmasının 3 üzvü Emili Rzayeva (63,5 kq), Aysu Devrişova (57 kq) və Xəyal Əliyev (67 kq) yarımfinala adlayaraq, minimum bürünc medalı təmin ediblər. Məhəbbət Hümbətov (71 kq) isə 1/4 finalda məğlub olaraq, turnirlə vidalaşıb.