\"Tottenham\"ın məşqçisi: \"Bu andan \"Qarabağ\"ın böyük pərəstişkarıyam\"

""Qarabağ" yaxşı komandadır"

Ölkə.Az xəbər verir ki, ötən axşam Londonda "Qarabağ" klubu ilə futbol matçında qarşılaşan "Tottenham" klubunun baş məşqçisi oyunu şərh edib.

"Mən sevinirəm ki, komanda xarakterini birüzə verə bildi. "Qarabağ" yaxşı komandadır. Onlar yaxşı oynayırdı və bu matç heç də asan deyildi. Penaltidən tez buraxılmış qoldan sonra xüsusən çətin idi. Ancaq mən şadam ki, komanda güc toplayaraq qalib gələ bilib.

"Qarabağ"ın oyunu mənim üçün sürpriz olub. Biz onların bir çox matçlarını izləmişik. Bu andan mən bu komandanın böyük pərəstişkarıyam. "Qarabağ"ın təbliğ etdiyi fəlsəfə və onların oyun tərzi mənim xoşuma gəlir. Azərbaycan çempionu 1/16 finala çıxış uğrunda mübarizə apara bilər", - deyə məşqçi qeyd edib.

Xatırladaq ki, sentyabrın 17-də axşam saatlarında Avropa Liqasının qrup mərhələsinin ilk turunda Azərbaycanın "Qarabağ" komandası Londonda "Tottenham" klubu ilə qarşılaşıb.

Şimali Londondakı Uayt Hart Leyn stadionunda keçirilən matçda ev sahibləri 3-1 hesabı ilə qalib gəliblər.

Rəşid Mustafazadə

Ölkə.Az