Media nümayəndələri Cüdo üzrə milli komandalar üçün Təlim-Məşq Mərkəzi ilə tanış olublar - FOTO
Cüdo üzrə milli komandalar üçün Təlim-Məşq Mərkəzində media tur təşkil olunub.
Ölkə.az xəbər verir ki, ərazisi 2 hektardan artıq olan idman qurğusunda yaradılan şəraitlə bağlı Azərbaycan Cüdo Federasiyasının baş katibi Rəşad Rəsullu mətbuat nümayəndələrinə məlumat verib.
R.Rəsullu mərkəzdən Gənclər və İdman Nazirliyi ilə birgə istifadə etdiklərini bildirib. Baş katib məşq zallarındakı tatami ən son standartlara uyğun olduğunu, eyni zamanda amartizasiya sisteminin quraşdırıldığını deyib. Bu da zədələrin qarşısını almağa kömək olacaq. Kişilərdən ibarət komanda üçün nəzərdə tutulan tatami beynəlxalq təlim-məşq toplanışları təşkil etmək baxımından yüksək səviyyədə olduğunu bildirib.
R.Rəsullu kompleksin tam şəkildə federasiyanın idarəetməsində olduğunu vurğulayıb. Kişilər və gənc oğlanlar üçün nəzərdə tutulan məşq zalında eyni vaxtda 100 idmançı məşq edə bilir.
Mərkəzdə fiziki hazırlıq zalı, məşqçilərin otaqları, 28 yerlik müasir otel bölməsi fəaliyyət göstərir. İdman qurğusu, eyni zamanda həkim otağı, fizioterapiya və masaj otaqları idmançıların ilkin reabilitasiyası və müalicəsi üçün ən son model cihaz və avadanlıqlarla təchiz edilib.
Əsaslı təmir zamanı uzunluğu 95 metr və eni 66 metr olan stadionun süni ot örtüyünün dəyişdirildiyini deyən baş katib əlavə edib ki, stadion müasir işıqlandırma sistemi ilə təchiz olunub.
