Sınıq telefonu ilə gündəm oldu, pul onu dəyişə bilmədi, məscidin tualetini təmizlədi - Sadio Mane kimdir - VİDEO
Vaxtilə "Bayern Munich", "Liverpool" kimi komandalarda çıxış edən, hazırda isə "Al-Nassr" klubunda oynayan seneqallı futbolçu Sadio Manenin adı yəqin ki çoxlarınıza tanışdır. O, vurduğu qollarla yanaşı, tez-tez təvzökar həyat tərzi ilə gündəmə gəlir.
Sonuncu dəfə 2019-cu ildə onun fubol qarşılaşmasından əvvəl ekranı qırılmış ayfonla görüntülənməsi bütün dünyada müzakirələrə səbəb olmuşdu.
Həmin dövrdə onun qazancını hesablayan KİV yazırdı ki, ulduz futbolçu istəsə 150 ən son model telefon ala bilər. Amma o pulu kasıb seneqallılara xərcləyir.
Ölkə.Az Sadio Mane haqqında bir sıra maraqlı faktları təqdim edir:
Sadio Mane 10 aprel 1992-ci ildə Seneqalda kasıb bir ailədə doğulub. Əmisi və qohumları ilə birlikdə 10 nəfərlik ailədə böyüyüb. Kiçik yaşlarından bu sahəyə olan istedadını kəşf etsə də, ailəsi onun müəllim olmasını istəyirdi.
Maddi sıxıntılara görə məktəbə gedə bilməyən Manenin uşaqlığı işləyərək və futbol oynayaraq keçib. Onun ən böyük xəyalı futbolçu olmaq idi və bunu çıxış yolu kimi görürdü.
Hətta o, 16 yaşında olarkən evdən qaçaraq paytaxt Dakarda komandalardan biri üçün sınaqdan keçməyə gedib, lakin onu tapıb evə qaytarıblar.
Sonradan paytaxtdakı futbol akademiyasında bacarıqlarını artıran Mane 2011-ci ildə ilk peşəkar müqaviləsini Fransanın "Metz" klubu ilə bağlayıb.
Ulduz futbolçu yoxsulluq içində keçən həyatının ona bir çox şey öyrətdiyini deyir:
"Ac qaldım, tarlada işlədim, ayaqyalın futbol oynadım, məktəbə getmədim. İndi başqalarına kömək edəcək gücdəyəm. Məktəblər, məscidlər, xəstəxanalar tikdirirəm. Ehtiyacı olan insanlara ayda 70 avro göndərirəm. Dəbdəbəli avtomobilləri və evləri nümayiş etdirməyə ehtiyac yoxdur. Həyatın mənə verdiklərini paylaşmağı xoşlayıram."
Mane inanılmaz tempi, texniki bacarığı və həlledici anlarda qol vurmaq bacarığı ilə tanınır.
O, 2012-ci ildə debüt edəndən bəri Seneqal millisinin əsas oyunçusudur.
Sadio Manenin 2015-ci ildə "Southampton" komandasında oynadığı zaman 2 dəqiqə 56 saniyə ərzində vurduğu 3 möhtəşəm qol Premyer Liqa tarixində ən sürətli hettrik olaraq qalır.
2016-cı ildə "Liverpool" Maneni 34 milyon funt-sterlinq qarşılığında transfer edib və o, həmin dövrün ən bahalı afrikalı futbolçusu olub.
Mane həmçinin "Liverpool" heyətində vurduğu 111 qolla Məhəmməd Salahdan sonra ikinci yeri tutub.
2021-ci ildə ilk dəfə Afrika Millətlər Kubokunu qazanmağa kömək etdikdən sonra Mane Seneqal Prezidenti tərəfindən bu ölkənin ən yüksək ordeninə layiq görülüb.
Kənddə xəstəxana olmadığından Manenin xəstə atasına lazımi tibbi müdaxilənin edilməsi mümkün olmamışdı. Buna görə də o Bambali kəndində xəstəxana tikdirib.
2018-2019 Premyer Liqa mövsümündə Mane "Qızıl buts" mükafatına layiq görülüb.
Onun ən sevdiyi iki futbolçu var: Ronaldinyo və El-Haci Diuf.
Mane 2019-cu ildə Afrikada ilin oyunçusu mükafatına layiq görüldüyü mərasimdən sonra dediyi sözlərlə diqqət çəkmişdi:
"Niyə 10 ədəd Ferrari, 20 almaz saat, ya da 2 təyyarə istəməliyəm? Bunlar mənə və dünyaya nə edəcək? Çox çətin dövrlərdən keçdim. Qazandığım hər şeyi futbola borcluyam. Buna görə də ölkəmə yardım edirəm".
Beynəlxalq İdman Araşdırmaları Mərkəzinin 2020-ci ili əhatə edən hesabatında Sadio Mane bazar dəyəri ən yüksək olan futbolçular siyahısında ilk onluğa daxil olmağı bacarıb.
O, xeyirxah əməllərinə və təvazökar həyat tərzinə görə "pulun dəyişdirə bilmədiyi futbolçu" adlandırılır.
Mərhum atası imam olan Mane namaz qılır, Quran oxuyur və dinin onun üçün çox əhəmiyyətli olduğunu deyir.
Hətta bir dəfə onun məscidlərdən birinin tualetini təmizləyərkən videosu da yayılmışdı.
Sadio Mane dövrümüzün ən istedadlı və nüfuzlu futbolçularından biri hesab edilir.
Billurə Yunus
