“Səviyyə fərqi sözünü dedi...”

“Millimizin oyunundan razı qaldım. Məğlub olsalar da, çox yaxşı oynadılar. Təəssüf ki, hüçumçumuz zədəli idi. Digər hüçumçu Erat isə hələ gəncdir. Onun İtaliya kimi komanda ilə oynayacaq təcrübəsi yoxdur”.

Bu sözləri Peşəkar Futbol Liqasının prezidenti Ramin Musayev açıqlamasında deyib.

“Avro-2016”nın seçmə mərhələsində millimizin İtaliya ilə görüşünü dəyərləndirən R.Musayev səviyyə fərqinin həlledici rol oynadığını bildirib:

“Stadionda 55 minə yaxın azarkeşin olması çox yaxşı haldır. Elə bir azarkeş görmədim ki, millimizdən narazı getsin. Axır ki, Azərbaycan millisi haqda ancaq xoş sözlər eşidirik. Buna görə də Robert Prosineçkiyə təşəkkürümü bildirirəm. İnanırıq ki, gələcəkdə daha yaxşı uğurlar əldə edəcəyik. İtaliya kimi bir komanda ilə belə oynayacağımızı, topa daha çox sahib olacağımızı gözləmirdim. Futbolçularımız əlindən gələni etdi. Amma səviyyə fərqi öz sözünü dedi. Bolqarıstanla oyunda Bədavi Hüseynovun olmaması işimizi çətinə sala bilər. Amma inanırıq ki, yaxşı nəticə ilə qayıdacağıq. Qələbə qazana bilməsək də, bərabərliklə dönsək, yaxşı olar”.

PFL rəsmisi millimizin kapitanı Rəşad Sadıqovun komandadan getmək istəməsinə də münasibət bildirib:

“Yığmada Rəşad Sadıqova ehtiyac var. Çünki məşqçidən başqa futbolçulara meydanda da lider lazımdır. O, özü gücünü bilir. Rəşadın yığmadan getməyi düzgün olmaz”. (qol.az)

Ölkə.az