Anar Məmmədov yeniyetmə qolfçularla görüşdü

Federasiya prezidenti yeniyetmələrin uğurları ilə maraqlanıb.

Oktyabrın 20-də Azərbaycan Qolf Federasiyasının prezidenti Anar Məmmədov Bakıda yerləşən Qolf Akademiyasını ziyarət edib.

AQF-dən Ölkə.Az-a verilən məlumata görə, Federasiya prezidenti “FlamesGolf” proqramı çərçivəsində Akademiyada tədris keçən yeniyetmələrlə, proqramın finalçıları ilə görüşüb.

Xatırladaq ki, 2015-ci ilin yanvar ayından başlayaraq Azərbaycan Qolf Federasiyasında qurumun prezidenti Anar Məmmədovun təşəbbüsü ilə, qolfun bir Olimpiya idman növü kimi inkişafı üçün 6 yaşından 16 yaşına qədər uşaqlarla “FlamesGolf” proqramı çərçivəsində dərslər başlayıb.

Proqramın məqsədi qolfu məktəblilər arasında populyarlaşdırmaqdır. Federasiyanın peşəkar məşqçiləri uşaqlarla maraqlı dərslər aparırlar, onlara qolfun tarixi, məşhur qolfçular haqqında danışır, bu gözəl oyunun əsaslarını öyrədirlər.

Yeniyetmələrlə görüşən Anar Məmmədov onların idmanın bu növündə qazandıqları uğurları ilə maraqlanıb. Görüşdə bildirilib ki, bu gün “FlamesGolf” proqramını uğurla keçən yeniyetmələr gələcəkdə Azərbaycanın milli qolf yığmasında təmsil olunacaqlar.

Federasiya prezidenti həmçinin yeniyetmə qolfçuların valideynləri ilə görüşüb, idmançıların gələcək perspektivlərini müzakirə ediblər. Bildirilib ki, ilin sonunda qolf üzrə yeniyetmələrdən ibarət ilk yığma komandanın heyəti tam formalaşdırılacaq. Komandada “FlamesGolf” proqramını uğurla bitirmiş qolfçular yer alacaqlar.