Ağasəlim Mircavadov "Qarabağ" və "Qəbələ"nin Avroliqadakı şanslarını dəyərləndirdi

Bu gün Avroliqadakı təmsilçilərimiz "Qəbələ" və "Qarabağ" 3-cü tur oyunlarına çıxacaqlar. "Bakcell Arena"da "Borussiya" (Dortmund) qəbul edəcək "Qəbələ" qrupdan çıxmaq şanslarını saxlamaq üçün güclü rəqibindən mütləq xal qoparmalıdır.

Çətin "Monako" səfərinə yollanan ağdamlılar isə bu oyunda məğlub olmayaraq, ən azı qrupdakı mövqeylərini qorumaq istəyirlər.

Ölkə.Az Hər 2 oyunla bağlı təcrübəli mütəxəssis, Azərbaycanın əməkdar məşqçisi Ağasəlim Mircavadovdan müsahibə alıb.

- Ağasəlim müəllim, əvvəlcə "Monako"-"Qarabağ" oyunu haqda fikirlərinizi öyrənmək istərdik.

- Belə bir qayda var ki, rəqibin evdəki və səfərdəki oyunlarını təhlil etməlisən, necə oynadıqlarını öyrənməlisən. "Qarabağ"ı tanıyıram və deyə bilərəm ki, öz oyun üslubları var. Evdə də, səfərdə də öz oyunlarını oynamağı bacarırlar. Ağdamlılar oyunlarını göstərə bilsələr, şansları var. "Monako"ya gəldikdə isə onlar evdə ağır oyun nümayiş etdirirlər. Azərbaycan çempionatı və Avroliqa oyunları arasında böyük fərq var. Milli çempionatda 10-15 qol vəziyyətinin 1-indən istifadə edirsənsə, Avropada gərək hər düşən fürsətdən istifadə edəsən. O da komandadakı oyunçuların təcrübəsindən asılıdır. "Qarabağ" hər şeydən istifadə eləməlidir. Rəqib ən çox qolu standart vəziyyətdən buraxırlar. Ümumilikdə, "Qarabağ"ın xal qazanmaq şansı var.

- "Qarabağ"ın qrupdan çıxmaq şanslarını necə qiymətləndirirsiniz?

- Qrupdan çıxmaq üçün gərək səfərdə qələbə qazanasan. Evdə isə rəqibə xal verməyəsən. Bunu bacara bilsək, qrupdan çıxacağıq. Reynaldo və bir neçə oyunçusunun zədəli olmasına baxmayaraq, "Qarabağ" güclü klubdur. Çumbinyo da zədədən qayıdandan sonra pis təsir bağışlamr.

- "Qəbələ"nin "Borussiya" (Dortmund) qarşısında şansı varmı?

- "Borussiya" Avropada yaxşı çıxış edir. Əslində Avroliqa turnirində böyük klublar tam gücləri ilə çıxış etmirlər. Buna 3-4 il öncə "Atletik Bilbao" ya uduzaraq turnirdən kənarlaşan "Mançester Yunayted" i misal göstərmək olar. UEFA-nın Avroliqanı qazanan klubun birbaşa Çempionlar Liqasınının qrup mərhələsinə vəsiqə qazanmasıyla bağlı qərarından sonra böyük klubların da motivasiyası artdı. Ona görə almanlar bu oyuna ciddi hazırlaşacaqlar. "Qəbələ"də təcrübəli oyunçular var, yaxşı da çıxış edir. Kiminlə oynayırsan oyna, hər klubun şansları var.

- Roman Qriqorçuk almanların hansı zəif cəhətindən istifadə edə bilər?

- Düşünürəm ki, "Borussiya" (Dortmund) tam hazır vəziyyətdədir. Neçə ildir birlikdə oynayan kollektivdir. Yeni gələn baş məşqçi də Kloppun oyun stilini dəyişməyib. Ancaq hər klubun zəif cəhəti var.

Taleh Rəcəb
Ölkə.az