TRT-dən Hakan Şükürə senzura

Türkiyə millisinin və "Galatasaray"ın əfsanəvi futbolçusu Hakan Şükürə qarşı TRT kanalı senzura tətbiq edib.

Ölkə.Az Türkiyə mətbuatına istinadən xəbər verir ki, TRT-də yayımlanan futbol proqramlarının birində "Unudulmaz Milli oyunlar" və "Unudulmaz oyunlar və reportajlar" rubrikasında Hakan Şükürün qolları verilməyib. Həmçinin "Kral" ləqəbli oyunçunun adının çəkildiyi bölümlərə də senzura qoyulub.

Əfsanəvi futbolçu məsələni belə şərh edib:

"Təəssüf ki, son zamanlarda bu cür vəziyyətlərlə rastlaşıram. Monakodakı “Qızıl Ayaq” mükafatını aldıqda da xəbər yayımlanmamışdı. Artıq böyük bir qorxu imperatorluğu dövründəyik. İnsanlar telefonlara çıxmağa bele ehtiyyat edir. O partiyanı (Ədalət və İnkişaf ) dəstəkləyənlərə bir sözüm yoxdur. Ancaq millətin kanalının sadəcə bir partiyanın səsi olması, ölkəyə saysız qələbələr yaşatmış birinin yenə millətin kanalında qollarının göstərilməməsi kədərləndiricidir. Bunları deyərkən studiodakı dostlarımı ayrı tuturam. Onlar sadəcə öz işlərini yerinə yetirirlər."

Qeyd edək ki, bir müddət əvvəl Hakan Şükür üzvü olduğu "Ədalət və İnkişaf" partiyasını tərk edib.

Taleh Rəcəb
Ölkə.Az