Böyükağa Hacıyev: Samir Əliyev üçün "Neftçi"də işləmək tez idi

Azərbaycan çempionatının 9-cu tur oyunları başa çatıb.

Tur çərçivəsində bir sıra gözlənilməz nəticələr qeydə alınıb. “Neftçi”nin ard-arda 3-cü məğlubiyyəti də tura öz damğasını vurub.

Ölkə.Az turun oyunları ilə bağlı Azərbaycanın futbol mütəxəssisi, “Neftçi”nin keçmiş baş məşqçisi Böyükağa Hacıyevdən müsahibə götürüb.

- Böyükağa müəllim, əvvəlcə AZAL-“Neftçi” oyunu haqda fikirlərinizi öyrənmək istərdik

- Qısa və konkret danışacam. AZAL bu oyunda “Neftçi”dən daha istəkli idi. Məhz bu istəyin hesabına AZAL qalib gəldi.

- Oyundan sonra Samir Mənsimov və Məhəmməd Qurbanov əvəzedici heyətə göndərildi. Bu haqda nə düşünürsünüz?

- Unutmayın hər ikisi istedadlı futbolçulardır. Samir Mənsimov da 21 yaşlılardan ibarət Azərbaycan yığma komandasında çıxış edir. Maraqlısı budur ki, iki oyunçu birdən-birə əvəzedici heyətə göndərildi, bəs bunların yerinə kimlər oynayacaq?

- Samir Əliyevin bu addımını nəyə bağlamaq olar?

- Samir Əliyev gənc və perspektivli baş məşqçidir. Amma baş məşqçi işləmək üçün zamana ehtiyac var. Mütləq təcrübən olmalıdır. Samir Əliyev çalışır ki, işində düzgün qərarlar versin. Mən Samir Əliyevdə günah görmürəm o, əlindən gələni edir. Ancaq Samir Əliyev üçün “Neftçi”də işləmək hələ tez idi.

- “Kəpəz” gözəl oyun nümayiş etdirdi, ancaq istədiyi nəticəni qazana bilmirdi. “Xəzər-Lənkəranla” oyunda istədiyi nəticəni aldı. Sizcə ”Kəpəz” növbəti oyunlarda da gözəl oyunu nəticəyə çevirə biləcəkmi?

- Sən oyununu oyna, nəticə özü gələcək. "Kəpəz" də səbrlə öz oyununu oynadı və istədiyi nəticəni aldı. Sadəcə bir az zaman lazım idi.

- “İnter” qarşısına “Rəvan” yeni baş məşqçi ilə çıxırdı. Lakin “Rəvan” yenə məğlub oldu. Bu oyunla bağlı nələr deyə bilərsiniz?

- Söhbət baş məşqçi dəyişikliyindən getmir. Komanda o zaman nəticə qazanar ki, düzgün komplektləşdirilsin. Əgər sistem düzgün qurulubsa, o komanda mütləq özünü göstərəcəkdir.

- “Zirə” çətin “Qəbələ” səfərindən xalla döndü. Sizcə “Zirə” gələcək turlarda bu uğurun davamını gətirə biləcəkmi, yoxsa fiaskoya uğrayacaq?

- Düşünürəm ki, “Zirə” autsayder olmayacaq. Əksinə, getdikcə daha da irəliyə gedəcəkdir. Futbolun yazılmamış qanunları var. “Zirə” bu yolda düzgün gedir. Səfərdə “Qəbələ” ilə bərabər oynadı. Həmçinin “Sumqayıt”- “Qarabağ” oyunu. Futbolda belə sürprizləri gözləyin.

- Samir Abbasovun gəlişindən sonra “Sumqayıt” növbəti xalını lider “Qarabağ”ı məğlub edərək aldı. Sizcə sumqayıtlılar bu çıxışı davam etdirə biləcəkmi?

- Samir Abbasovun gəlişindən sonra komandada istək çox böyükdür. Ola bilsin komanda düzgün motivasiya olunur və oyuna heyət düzgün çıxarılır. Samir Abbasovun gəlişi öz nəticəsini göstərdi. İnanıram ki, növbəti oyunalarda da bu uğuru davam etdirəcəklər.

Taleh Rəcəbli
Ölkə.az