"Qarabağ"ın akademiya direktoru: “Gələcəkdə onlarla işbirliyi ola bilər”
“Qarabağ" futbol akademiyasının direktoru Aftandil Hacıyevin Ölkə.az saytına müsahibəsi:
- Hazırda "Qarabağ" akademiyasında işlər necə gedir?
- Akademiyada demək olar ki, bir çox komandalar final mərhələlərində iştirak edir. U-17 yaşların son turu, digər yaş qruplarında - U-13 yaşdan aşağı qruplar mövsümü başa vurublar, U-14, 15, 16 komandaları isə play-off mərhələsində oynayırlar. Bu gün U-14 və U-15 final görüşlərinə çıxacaqlar.
- 2 ildir, "Qarabağ" klubunun akademiyasına rəhbərlik edirsiniz, baş məşqçi olmaq çətindir, yoxsa akademiya rəhbəri olmaq?
- Əlbəttə, rəhbərlik etmək olduqca məsuliyyətli vəzifədir, ancaq hər işin öz məsuliyyəti var, fərqləndirmək istəməzdim. Ancaq təbii ki, akademiyada geniş kütlə ilə, daha çox personalla, müxtəlif yaş qruplarından olan futbolçularla çalışırsan. Ona görə rəhbərlikdə təmsil olunanda işlər də çox olur.
- Ötən həftələrdə sizə Tovuzun "Turan" klubundan baş məşqçi kimi çalışmaq təklifi gəlmişdi, hazırda digər təkliflər varmı?
- Bəli, təklif gəlmişdi, bir neçə namizəd var idi, onlardan biri mən idim. Klub rəhbərliyi ilə aramızda görüş baş tutdu, elə ilk görüşdə məsələləri müzakirə etdik, ona görə də növbəti görüşə ehtiyac duymadıq. Düşünürəm ki, hazırkı məqam üçün uyğun qərar qəbul etdim, lakin gələcəkdə vəziyyət başqa cür ola bilər. "Turan" mənim üçün hər zaman sevdiyim klublardan olub, futbolçu karyeramda da uğurlu mövsüm keçirmişəm o klubda. Hətta millidə əsas heyət üzvü olan zaman "Turan"da çıxış edirdim, eyni zamanda klub tarixində ən çox oyun keçirən futbolçu kimi tarixə düşmüşəm. Lakin məşqçi kimi çalışmaq bir başqadır, çünki burada məsuliyyət, götür-qoy və bəzi məsələlər var ki, qərar qəbul edəndə insan bir neçə dəfə fikirləşməli olur. Lakin gələcəkdə "Turan Tovuz" rəhbərliyi ilə işbirliyi ola bilər.
- Aftandil müəllim, Avrokuboklarda çıxış edəcək klublarımızın rəqibləri bəlli oldu. Şansları necə dəyərləndirirsiniz?
- Bütün rəqiblərimiz keyfiyyətlidir, hər bir klubumuzun növbəti mərhələyə keçmək üçün şansları var. Son illər Azərbaycan klubları çox inkişaf edir, eyni zamanda Premyer Liqada olduqca layiqli mübarizə aparıblar. Hər birinə inanırıq. Düzdür, rəqiblər reytinqdə və başqa amillərdə üstün görünə bilər, ancaq bu gün bizim klublarımız da inkişaf edir.
- AVRO-2024-də favoritiniz kimdir?
- Mənim fovaritim İspaniyadır, həmişə o komanda maraqlı olub. Ancaq indi tək İspaniyanı da söyləmək çətindir, çünki digər millilər də keyfiyyətli oyun sərgiləyirlər. Onlardan Almaniyanı qeyd etmək olar, Fransa, İtaliyada yaxşı formadadır. Lakin bu futboldur orta səviyyəli komandalar da finala yüksələ bilərlər, amma böyük ehtimalla finalda bayaq sadaladığım komandaları finalda görəcəyik.
Ölkə.Az
