\"Böyükağa Hacıyev bu tərz açıqlamalarla gündəmə gəlmək istəyir\"

Tanınmış futbol mütəxəssisi Böyükağa Hacıyevin "Neftçi" klubu haqqında səsləndirdiyi kinayəli sözlər cavabsız qalmayıb

Qeyd edək ki, Hacıyev dünən Ölkə.az-a açıqlamasında dolayısıyla paytaxt təmsilçisini ölü adlandırmışdı:

""Neftçi"yə dörd bacı, bir ana lazımdır ki, qoyub qabağına oturub ağlasın. Klubdan təklif gəldiyi halda belə bu vəziyyətdə razılaşmaram."

Ölkə.az məsələ ilə bağlı klubun mətbuat katibi Mehman Rəsulovun fikirlərini öyrənib. O, fikirlərini belə bildirib:

"Böyükağa müəllim yenə də öz ampulasındadır (gülür). Həmişə öz açıqlamaları ilə gündəmə gəlib və ya gəlmək istəyib. "Neftçi"də işləyərkən belə bu tərz açıqlamaları olub. Hər zaman gənc yerli mütəxəssislərə dəstək verib, bu mənəvi dəstəyini indi də gözləyirik."

Mətbuat katibi həmçinin qeyd edib ki, "Bu artıq ənənəvi haldır ki, hal-hazırda məşqçi kimi fəaliyyət göstərməyən məşqçilərimiz klubların məşqçilərinə, onların durumlarına qiymət verir. Onlar öz şəxsi fikirlərini səsləndirirlər. İstənilən halda Böyükağa müəllimin və ya başqa mütəxəssislərin fikirlərini şərh eləmək fikrində deyilik."

Mehman Rəsulov baş məşqçi Samir Əliyevin "Rəvan"a məğlubiyyətdən sonra açıqlamasına da fikir bildirib:

"Oyundan sonra təbii haldır ki, emosiyalar qabarır və bu cür açıqlama verib. Ancaq klub rəhbərliyi və digər işçilər vəhdət təşkil edir. Hamı bir məqsəd üçün çalışır. Samir Əliyev hal-hazırda klubumuzun baş məşqçisidir, komanda ilə birlikdə "Xəzər-Lənkəran" oyununa hazırlaşırlar. Hətta bu gün də klubun bazasında klubun məşqi baş tutub. Əgər Samir Əliyev klubdan ayrılsa bu barədə klubun rəsmi saytında məlumat veriləcək."

Qeyd edək ki, "Rəvan"la oyundan sonra Samir Əliyev İstefa qərarının üstündə durmadığı üçün peşman olduğunu bildirib.

Ölkə.Az