\"Neftçi\" rəsmisi: Mətbuat xəbərləri yazdıqda mənbə göstərsin

"Neftçi" klubunun əsas qapıçısı Aqil Məmmədovun transfer iddiaları ilə bağlı klub rəsmisi açıqlama verib.

Ölkə.Az-a açıqlamasında klubun mətbuat katibi Mehman Rəsulov yayılan xəbərlərin əsassız olduğunu qeyd edib. O, məsələylə bağlı bunları söyləyib:

"Mətbuat xəbərləri yazdıqda mənbə göstərsin. Mənbə dəqiq olduqda xəbər güclü olur. Klubdan rəsmi məlumat verilməyənə qədər bu xəbərlərin heç bir əsası yoxdur.

Milli komandamızın düşərgəsində olan Aqil Məmmədov yoxlama görüşlərindən sonra yenidən kluba qayıdaraq "Neftçi"nin formasını geyinməyə davam edəcək. Hər hansı bir rəsmi təklif olarsa ictimaiyyətə rəsmi şəkildə məlumat verəcəyik."

Qeyd edək ki, iddiaya əsasən Flaqmanın əsas qapıçısı Aqil Məmmədov dekabrda klubu tərk edəcək. Həmçinin məlumatda deyilir ki, futbolçuya Türkiyə PTT 1 liqanın iddialı klublarından təkliflər gəlib.

Taleh Rəcəbli
Ölkə.Az