AZAL klubunun rəsmisi: Bu, \"Şəfa\" stadionunda ilk belə hadisə deyil

Azərbaycan premyer liqasının 13-cü turu çərçivəsində keçirilən "İnter" - AZAL görüşündən sonra insident yaşanıb.

Təyyarəçilərin vitse-prezidentdi Fikrət Hüseynov və baş məşqçi Tərlan Əhmədov oyun sonrası soyunub-geyinmə otağına yollanarkən polislər tərəfindən içəriyə buraxılmayıblar. AFFA nümayəndəsinin məsələyə müdaxiləsi sonrası baş verən gərginlik aradan qalxıb.

Ölkə.az məsələyə bağlı klubun mətbuat katibi Eldəniz Yusifovla əlaqə saxlayıb. Klub rəsmisi məsələnin kiçik anlaşılmazlıq olduğunu qeyd edib. Mətbuat katibi olay haqda ətraflı olaraq bunları söyləyib:

"Bu, "Şəfa" stadionunda ilk belə hadisə deyil. Digər klublar da təsdiq edə bilər ki, belə hadisələr yaşanıb. Bu tərz hadisələrə səbəb stadionun bir giriş qapısının olmasıdır. Burada da istər-istəməz sıxlıq yaranır. Klub rəsmiləri oyundan sonra paltar dəyişmə otağına yollanarkən onların girişinə polislər icazə vermədi. Bunu isə polislərimiz bir qədər normalardan kənara çıxaraq etdilər. Mən bunu polisin öz işinə məsuliyyətlə yanaşması kimi qiymətləndirirəm və bu məsələdə onları günahlandırmıram."

Eldəniz Yusifov olayın AFFA tərəfindən verilən təqdimatdan sonra sakitləşdiyini bildirib.

"İnsidentin yarandığını görən AFFA nümayəndəsi Mübariz Hüseynov dərhal müdaxilə edərək məsələni həll etdi. Gələcəkdə belə halların qarşısını almaq üçün biz məsələni AFFA nümayəndələri və polis rəisləri ilə müzakirə elədik. Stadionun mətbuat üçün ikinci qapısı var. Biz "Şəfa" stadionunda ev oyunlarımızı keçirdiyimiz zaman bu qapını oyun zamanı açırdıq. Mətbuat işçiləri və klub rəsmiləri ikinci qapıdan rahat şəkildə istifadə edirdilər. Biz bununla bağlı öz məsləhətlərimizi "İnter" klubuna verdik. Düşünürəm ki, oyun öncəsi keçirilən iclas zamanı bu məsələlər həll olunmalı idi. İnanıram ki, gələcək oyunlarda bunlar nəzərə alınaraq belə halların qarşısı alınacaq."

Qeyd edək ki, görüş "İnter"in 2:0 hesablı qələbəsi ilə bitti.

Taleh Rəcəb
Ölkə.az