Ayı ilə güləşən boksçu.... – O, ağzı bağlı, cilovlu heyvana “qalib gəlib”

İnstaqramda məşhur özbəkistanlı boksçu Şəhram Qiyasovun “Buka” idman zalında ağzı bağlı ayı ilə döyüşdüyünü əks etdirən video yayılıb.

Ölkə.az Musavat.com-a istinadla xəbər verir ki, musiqi müşayiəti və ərəb dilində “Rəhman və rəhim olan Allahın adı ilə!” sözləri ilə ilə yayımlanan videoda idmançı dəfələrlə heyvanı kürəyi üstə yerə çırpır. Eyni zamanda görünür ki, kimsə ayını cilovda saxlayıb.

Sosial şəbəkələrdə dünya çempionu və olimpiya oyunlarının gümüş mükafatçısının bu hərəkəti pislənib. Tamaşaçılar görüntülərin yayıldığı platformada paylaşımın şərh bölümündə “dəhşətli”, “iyrənc”, “heyvandan sui-istifadə” kimi sözlər yazıblar, Şəhramın ağzı, pəncəsi bağlı, yəni hərəkəti məhdudlaşdırılmış heyvana “qalib gəlməsini” ucuz şou adlandırıblar.

İctimai təpkidən sonra video silinib, lakin bir çox başqa kanallar onu kopyalaya bilib.

Heyvanların mühafizəsi cəmiyyəti “Mehr” və “Oqibat” videodan şoka düşən vətəndaşlardan mesajlar aldığını bildirib. Lakin məlumatda videoda başqa idmançıların da yer aldığı bildirilir.

Qurum bununla bağlı Daxili İşlər Nazirliyi və Ekologiya, Ətraf Mühitin Mühafizəsi və İqlim Dəyişiklikləri Nazirliyinə bəyanat hazırlayıb.

Hələlik nə idmançı, nə də çəkilişlərin aparıldığı idman zalı hər hansı şərh verməyib.