Neymar Juninyo ilə komanda yoldaşı ola bilər
Səudiyyə Ərəbistanının "Əl-Hilal" klubunun futbolçusu Neymar karyerasını Braziliyanın "Flamenqo" klubunda davam etdirə bilər.
Ölkə.az Qaynarinfo-ya istinadən xəbər verir ki, bu barədə "Transfer News Live" məlumat yayıb.
Braziliya klubu Neymarla müqavilə imzalamaq niyyətindədir və onun üçün təklif hazırlayır.
Neymar 2023-cü ilin yayında 90 milyon avroya Fransanın PSJ klubundan "Əl-Hilal"a keçib, yeni komandası üçün 5 oyun keçirib və bir qol vurub. 18 oktyabr 2023-cü ildə Neymar Braziliya millisinin Uruqvaya qarşı matçında zədələnib - çarpaz bağları və menisküsü yırtılıb. Onun sağalması təxminən 10 ay çəkəcəyi gözlənilir.
Neymar 2013-2017-ci illərdə "Barselona"da çıxış edib. "Barselona"nın heyətində iki dəfə (2014/15, 2015/16) İspaniya çempionu olub və üç dəfə ölkə kubokunu qazanıb. 2014/15 mövsümündə kataloniyalılar Çempionlar Liqasının qalibi olublar.
Qeyd edək ki, bundan əvvəl "Qarabağ"dan Juninyo "Flamenqo"yə transfer olunub.
