\"Neftçi\" klubunun rəsmisi: “Türk Hava Yolları” ilə çalışmaq bizə də maraqlı olar

Dünyanın məşhur hava yolları şirkətlərindən sayılan “Türk Hava Yolları” (THY) şirkətinin Bakı ofisinin rəhbəri Seyfullah İlyas bu gün “Neftçi” PFK-nın qonağı olub.

Ölkə.az görüş haqqında məlumat almaq üçün klubun mətbuat katibi Mehman Rəsulovla əlaqə saxlayıb. Klub rəsmisi görüşdə gələcək əməkdaşlıq planlarından danışıldığını qeyd edib.

- Növbəti mövsümdən “Türk Hava Yolları” (THY) şirkətini "Neftçi"nin rəsmi sponsoru kimi görə bilərikmi?

- Bu haqda nəsə demək hələ tezdir. Əvvəlcə detallar müzakirə olunmalıdır. Sadəcə deyə bilərəm ki, ilkin görüşmələr uğurla keçdi. Ümid edirik ki, əməkdaşlıq davam edəcək.

- Klub rəhbərliyi şirkətlə sponsorluq müqaviləsinə necə baxır?

- Əlbəttə yaxşı.“Türk Hava Yolları” ilə çalışmaq bizə də maraqlı olar. Şirkət 110 ölkəyə uçuş həyata keçirir, avroliqa turnirinin baş sponsorudur, "Borussiya" (Dortmund), "Marsel" kimi klublara sponsorluq edir.

- Görüş təklifi "Neftçi" klubundan olub?

- Bəli, biz tərəfdən dəvət olundular və qarşı tərəf də təklifi isti qarşıladı. Biz beynəlxalq uçuşlar zamanı “Türk Hava Yolları”nın xidmətindən də yararlanırıq. Əgər mütamadi olaraq onların xidmətindən istifadə ediriksə nəyə görə onlarla əməkdaşlıq etməyək.

Qeyd edək ki, şirkət Türkiyənin 4 böyük klubu - “Qalatasaray”, “Beşiktaş”, “Fənərbağça” və “Trabzonspor”la da əməkdaşlıq edir. Məşhur aviaşirkət basketbol üzrə Avropa qitəsinin ən nüfuzlu klub turniri olan Avroliqanın da rəsmi sponsorudur.

Taleh Rəcəb
Ölkə.Az