Kliçkonun 11 il ərzində ilk məğlubiyyəti

Tayson Füri dünya çempionu tituluna sahib çıxıb.

Britaniyalı boksçu Tayson Füri ukraynalı Vladimir Kliçkonu məğlub edərək İBF, İBO, WBO və WBA versiyaları üzrə dünya çempionu tituluna sahib çıxıb. 

Döyüş noyabrın 29-da gecə Düsseldorfda keçirilib.
 
Britaniyalı rəqibinə xal hesabı ilə qalib gəlib. 12 raundun yekununda hakimlər üstünlüyü T. Füriyə veriblər. Hakimlərin rəyi belə olub: 115-112, 115-112, 116-111 T. Fürinin xeyrinə.
 
39 yaşlı Kliçko ilə 27 yaşlı Füri arasında görüş oktyabrın 24-ə planlaşdırılsa da, ukraynalının zədələnməsi səbəbindən döyüşün vaxtı dəyişdirilmişdi.
 
V. Kliçko T. Fürinin üstün olduğunu qeyd edərək, revanş matçına ümid etdiyini bildirib.
 
Ukraynalı döyüşçünün hesabında 68 döyüşdə 64 qələbə (53-ü nokautla) var. Füri isə indiyədək keçirdiyi 25 qarşılaşmanın hamısında qalib gəlib (18-i nokautla).

Bu Kliçkonun 2004-cü ildən ilk məğlubiyyətidir. (APA)

Ölkə.Az