“Formula-1” Avropa Qran-prisi ilə əlaqədar Bakıdakıotellərlə memorandum imzalanıb
“Bakı Şəhər Halqası” Əməliyyat Şirkəti (BŞH) martın 2-də “Gilan Mehmanxanalar Qrupu”, “Bakı Bulvar” və “Şah Palas” otelləri ilə qarşılıqlı əməkdaşlıq imkanlarının inkişafına dair memorandum imzalayıb.
AZƏRTAC xəbər verir ki, memorandumu “Bakı Şəhər Halqası” Əməliyyat Şirkətinin kommersiya şöbəsinin rəhbəri Bülənt Özərdim, “Gilan Mehmanxanalar Qrupu”nun direktoru Elgün Məmmədov, “Bakı Bulvar” otelinin baş meneceri Valentin Osolos və “Şah Palas” otelinin baş meneceri Davut Furkan Emen imzalayıblar.
Mərasimdə tərəflər bu il Bakıda ilk dəfə keçiriləcək “Formula-1” Avropa Qran-prisi çərçivəsində qarşılıqlı əməkdaşlıq imkanlarının inkişafı istiqamətində birgə fəaliyyət haqqında razılıqlarını ifadə ediblər.
Avropa Qran-pri yarışlarının ölkəmiz üçün iqtisadi faydalarından danışan BŞH-nin kommersiya şöbəsinin rəhbəri Bülənt Özərdim deyib: “Cari mövsümdə “Formula-1” təqvimi 21 ölkəni əhatə edir. Azərbaycan “Formula-1” yarışlarında yeni ölkə olduğu üçün diqqət mərkəzindədir. Ötən ilin dekabrında yeni mövsüm açıqlandıqdan sonra Bakı bir daha digər iştirakçı ölkələrin, dünya mediasının diqqət mərkəzində oldu. Hər yerdə Bakı və yarışın təşkilatçılığı haqqında yazırlar. Avropa Qran-pri yarışları turizmin, otellərin, restoranların, aviareyslərin və digər sahələrin canlanmasına və inkişafına töhfə verəcək”.
Bilet satışından məmnun qaldıqlarını bildirən Bülənt Özərdim qeyd edib ki, yaxın günlərdə paytaxtın ticarət mərkəzlərində xüsusi bilet satışı məntəqələri quraşdırılacaq. Ötən il dekabrın 19-da biletlərin onlayn satışa çıxarıldığı anda ABŞ-dan sifarişlər qəbul olunmuşdu. Bu, bizi çox sevindirir. Satılan biletlərin 65 faizi xarici vətəndaşların payına düşür. Avropa Qran-pri yarışlarına biletləri almaqda Rusiya, İngiltərə, Hollandiya, Almaniya və Ukraynadan olan azarkeşlər fəallığı ilə seçilir.
Çıxışlarda Avropa Qran-pri yarışlarının keçiriləcəyi 17-19 iyun tarixləri üçün otellərin xarici turistlər və yarış iştirakçıları tərəfindən artıq sifariş edildiyi, həmin günlərdə ölkəmizə turist axınının olacağı diqqətə çatdırılıb.
Sonda jurnalistlərin sualları cavablandırılıb.
