Mariya 30 milyon dollar itirəcək
Beynəlxalq Tennis Federasiyası dopinq qəbulunu etiraf etmiş rusiyalı tennisçi Mariya Şarapovanı martın 12-də yarışlardan kənarlaşdırmaq haqda qərar qəbul edə bilər.
Şarapova meldoniy preparatından istifadə etdiyinə görə oyunlardan 4 il müddətinə kənarlaşdırıla bilər. Ona hətta 1 il müddətinə oynamaq qadağan olunsa da, bu müddətdə təxminən 30 milyon dollar itirəcək.
“Forbes”in məlumatına görə, tennisçi 2015-ci ildə 27, 9 milyon dollar gəlir əldə edib. Bu məbləğin 6, 7 milyon dolları mükafat olub, qalanı isə sponsor və reklam müqavilələrindən qazanılıb.
Qeyd edək ki, artıq 3 iri şirkət Şarapova ilə sponsorluq müqaviləsini uzatmayacağını bildirib. Bunlar “Nike” idman malları, “Porsche” avtomobil və İsveçrənin “TAG Heuer” saat istehsalçılarıdır.
Xatırladaq ki, M. Şarapova martın 7-də keçirdiyi mətbuat konfransında ona edilən dopinq-testin müsbət çıxdığını, meldoniy preparatından 2006-cı ildən istifadə etdiyini bildirib.
Meldoniy aparatı 2016-cı il yanvarın 1-dən qadağa edilib. (qafqazinfo)
