“Bizim polis pul almır...”
Topaz Premyer Liqasının 26-cı turu çərçivəsində keçirilən "Neftçi" - "Kəpəz" qarşılaşmasından sonra qonaqların baş məşqçisi Şahin Diniyevin iştirakı ilə mətbuat konfransı keçirilib.
Ölkə.Az futbolinfo.az-a istinadən xəbər verir ki, təcrübəli mütəxəssis 3:2 hesablı qələbəni şərh etməzdən öncə media mənsublarını Novruz bayramı münasibəti ilə təbrik edib:
"Oyun maraqlı alındı. Azarkeş baxımından da, qol baxımından da. Bol qollu oyun izlədik. Hər iki tərəf açıq futbol oynadı. Bu qələbəyə böyük ehtiyacımız var idi. Avrokuboklara vəsiqə qazanmaq baxımından olduqca mühüm qələbə qazandıq. Sevinirəm ki, həm 11 illik seriyanı qıra bildik, həm də gəncəlilərə bayram hədiyyəsi etdik. "Neftçi"yə də bu cür oyun alınmasına görə təşəkkürümü bildirirəm".
- Vəli Qasımov hakimlikdən şikayətlənsə, nə dərəcədə haqlı olacaq?
- Hər kəsin fikrinə hörmətlə yanaşıram. Amma biz həmkarıq və kimisə müzakirə edə bilmərəm. Ancaq onu deyə bilərəm ki, bu gün biz qələbəyə layiq idik.
- Namiq Ələsgərova qarşı penalti epizodunu şərh edərdiniz...
- Penalti var idi.
- Hər iki qapıya penalti vurularkən, meydançaya arxanızı çevirdiniz. Bu, yeni inancınızdı?
- 1997-ci ildən bəri komandam penalti vurarkən, zərbəyə baxmıram. O ki qaldı "Neftçi"nin penaltisinə, bunu ilk dəfə idi ki, etdim. Çünki oradakı polis əməkdaşlarından biri hər iki penaltidən öncə "mənə bax, hər şey yaxşı olacaq", dedi. Birində düz çıxdı, digərində aldatdı.
- Polisin şirinliyini verdiniz?
- Yox-yox, bizim polis pul almır axı! (gülür).
