Komanda üzvlərinin hamısında dopinq aşkarlandı
Məşhur tennisçi Mariya Şarapovanın dopinq etirafından sonra Rusiya idmanında daha bir qalmaqal baş verib.
Rusiyanı Dünya Çempionatında təmsil etməyə hazırlaşan Milli Hokkey komandasının 18 yaşdan aşağı üzvlərinin hamısında dopinq aşkarlanıb.
Ən azı 15 hokkeyçidə aparılan dopinq testlərinin nəticəsi müsbət çıxdıqdan sonra 30 nəfərdən ibarət komandanın heyəti dəyişdirilib.
Aprelin 14-də keçiriləcək oyunda Rusiya Amerikaya qarşı 17 yaşdan aşağı idmançılarla mübarizə aparacaq.
Xatırladaq ki, Mariya Şarapovnın orqanizmində istifadəsi qadağan olunmuş preparat çıxıb. O, bu barədə martın 7-də keçirdiyi mətbuat konfransında bildirib.
O, dopinq-test etdirdiyini və müsbət nəticə çıxdığını söyləyib: “Bu barədə mənə bir neçə gün öncə Beynəlxalq Tennis Federasiyasından göndərilən məktubda bildirildi. Məndə meldoniy preparatı aşkarlanıb. Bu dərmanı 2006-cı ildən səhhətimə görə qəbul edirəm”, - deyə o əlavə edib.
Artıq 3 iri şirkət Şarapova ilə sponsorluq müqaviləsini uzatmayacağını bildirib. Bunlar “Nike” idman malları, “Porsche” avtomobil və İsveçrənin “TAG Heuer” saat istehsalçılarıdır.
O, eləcə də BMT-nin xoşməramlı səfiri titulundan məhrum edilib. (qafqazinfo)
