FİFA-nın baş katibi vəzifəsinə tarixdə ilk dəfə qadın seçilib
BMT-nin seneqallı diplomatı Fatma Samura tarixə FİFA-nın baş katibi vəzifəsini tutan ilk qadın kimi düşəcək.
Bu barədə müvafiq qərar ali futbol qurumunun 66-cı konqresində qəbul edilib.
FİFA prezidenti Canno İnfantino bu seçimi mütərəqqi addım kimi dəyərləndirib:
“Biz gender bərabərliyi baxımından əla qərar verdik. Üstəlik bu xanım keçmişin yox, gələcəyin təmsilçisidir. Düşünürəm ki, çox mütərəqqi seçim və təyinat oldu”.
Samura BMT-nin 21 ildir davam edən inkişaf proqramının Nigeriyadakı daimi nümayəndəsidir. O, FİFA Nizamnaməsinə əsasən, iyunun ortalarınadək sınaq dövrü keçəcək.
Qeyd edək ki, son zamanlar FİFA-da baş katib səlahiyyətlərini Markus Kattner yerinə yetirib. Fatma Samura isə rüşvət qalmaqalı ilə əlaqədar futboldan kənarlaşdırılmış Jerom Valkeni əvəzləyib. (oxu.az)
