“Qarabağ” faciəvi tarixə görə böyük hörmətə layiqdir

İtaliyanın ANSA xəbər agentliyinin və “Sport mediaset” idman saytlarında Ağdamın “Qarabağ” futbol klubu ilə bağlı məqalələr yerləşdirilib

Ölkə.Az azərtac-a istinadən xəbər verir ki, məqalələrdə qeyd olunur: “Ağdamın “Qarabağ” klubu “İnter”in qarşılaşacağı ilk Azərbaycan komandası deyil. Bundan əvvəl bu klub Bakının “Neftçi” komandasının rəqibi olub. Lakin “Qarabağ” çox fərqli bir komandadır. Bu klub təkcə oynadığı oyuna görə deyil, həm də çiynində daşıdığı faciəvi tarixə görə böyük hörmətə layiqdir”.

“Qarabağ” futbol klubunun yaranma tarixi haqqında məlumatların yer aldığı yazılarda vurğulanır ki, bu komanda 1951-ci ildə Azərbaycanın Ağdam şəhərində təsis olunub. Lakin klubun vəziyyəti 1990-cı illərdə baş verən Dağlıq Qarabağ münaqişəsi nəticəsində olduqca pisləşib. Ermənistan tərəfindən Azərbaycana məxsus bölgənin işğalı nəticəsində Ağdam şəhərinin dağıdılması klubun öz doğma meydançalarından kənar düşməsinə gətirib çıxarıb. Qanlı müharibə dayandırılsa da, “Qarabağ” hələ də öz meydançasına qovuşa bilməyib. Bu kəşməkəşli yola baxmayaraq klub uğurlarını davam etdirir.

Oxucuların diqqətinə çatdırılır ki, 2008-ci ildə “Qarabağ” komandasına Qurban Qurbanovun baş məşqçi təyin olunmasından sonra klubun fəaliyyətində canlanma müşahidə edildi. Komanda 2013-2014-cü il mövsümündə 21 ildən sonra yenidən Azərbaycan çempionu adını qazanaraq dünya reytinqində öz mövqeyini yaxşılaşdırdı.

Yazılarda, həmçinin “Qarabağ” klubunun qələbə qazandığı müxtəlif oyunlar haqqında ətraflı məlumat verilir.

Məqalənin tam mətnlərini aşağıdakı linklərdə oxumaq olar:

//www.sportmediaset.mediaset.it/calcio/calcioestero/2014/articoli/1047729/europa-league-chi-sono-gli-azeri-del-qarabag-160-.shtml

//www.ansa.it/lombardia/notizie/2014/10/01/europa-league-qarabag-gli-esuli-azeri-avversari-dellinter-_de0f4c41-6d4b-4fbe-aedf-5366caed9037.html

Ölkə.Az